Crime News : उत्तर प्रदेशातील पिलीभीत जिल्ह्यात घडलेल्या एका भीषण घटनेमागचे गूढ उकलण्यात पोलिसांना यश आले आहे. 10 जुलैच्या रात्री घडलेला ट्रकचा अग्निकांड हा कोणताही अपघाती प्रसंग नसून, एका महिलेने रचलेला गुन्ह्याचा भीषण कट असल्याचे पोलीस तपासात उघडकीस आले आहे. रुद्रपूर येथील 40 वर्षीय अमनदीप कौर उर्फ अमन हिने तिच्या 4-5 वर्षांपासूनच्या प्रेमसंबंधांमधून बाहेर पडण्यासाठी प्रियकर बलविंदर सिंग याचा अतिशय क्रूरपणे बळी घेतला.
10 जुलैची ती घटना आणि पोलिसांचा तपास
10 जुलैच्या रात्री पूरनपुर पोलीस ठाण्याच्या हद्दीत असणाऱ्या 'बडी नहर' आणि गुरुद्वारा धन्ना बाबा नजीक उभ्या असलेल्या 'JH02K9750' या क्रमांकाच्या ट्रकला भीषण आग लागल्याची माहिती पोलिसांना मिळाली होती. अग्निशमन दलाच्या साहाय्याने आग विझवल्यानंतर ट्रकच्या कॅबिनमध्ये पूर्णपणे जळालेला एक मृतदेह आढळला. तपासादरम्यान मृत व्यक्तीची ओळख रामपूरचा रहिवासी आणि ट्रकचा मालक-चालक बलविंदर सिंग अशी झाली. बलविंदरचा भाऊ गुरमीत सिंग याच्या तक्रारीवरून पोलिसांनी गुन्हा नोंदवून तपास चक्रे वेगाने फिरवली.
नाते संपवण्याच्या वादातून डोक्यात रॉड आणि डिझेलचा वापर
पोलीस अधीक्षक सुकीर्ती माधव यांच्या मार्गदर्शनाखाली पोलिसांनी परिसरातील CCTV फुटेज आणि सर्व तांत्रिक पुराव्यांची सखोल तपासणी केली. त्या आधारे संशयित महिला अमनदीप कौर हिला ताब्यात घेण्यात आले. कडक चौकशीदरम्यान तिने गुन्ह्याची कबुली दिली. अमनदीपला बलविंदरसोबत असलेले नाते संपवायचे होते, परंतु बलविंदर याला तीव्र विरोध करत होता. 10 जुलैच्या रात्री दोघांमध्ये ट्रकच्या कॅबिनमध्ये याच विषयावरून वाद झाला. वाद विकोपाला गेल्यानंतर अमनदीपने ट्रकमधील लोखंडी रॉडने बलविंदरच्या डोक्यावर जोरदार प्रहार केला, ज्यामुळे तो जागीच बेशुद्ध पडला.
पुरावा नष्ट करण्यासाठी डिझेल ओतून पेटवला ट्रक
बलविंदर बेशुद्ध झाल्यानंतर अमनदीपने ही घटना अपघाती वाटवी आणि पुरावे नष्ट व्हावेत यासाठी कॅबिनमध्ये ठेवलेले डिझेल त्याच्यावर ओतले व वाहनाला आग लावून दिली. या भीषण आगीत होरपळून बलविंदरचा जागीच दुर्दैवी मृत्यू झाला. पोलिसांनी घटनेत वापरलेला लोखंडी रॉड आणि डिझेलचा डबा जप्त केला असून आरोपी महिलेला न्यायालयीन कोठडीत पाठवले आहे.
