भारतीय चित्रपटसृष्टीत सध्या एकाच नावाची आणि एकाच सिनेमाची जोरदार चर्चा सुरू आहे, तो म्हणजे 'धुरंधर -द रिव्हेंज' (धुरंधर 2). प्रेक्षकांची उत्कंठा शिगेला पोहोचवणाऱ्या या सिनेमाने बॉक्स ऑफिसवर अक्षरशः धुमाकूळ घातला आहे. पहिल्याच दिवशी तब्बल 145 कोटी रुपयांचा गल्ला जमवून या सिनेमाने बॉलिवूडच्या इतिहासातील आतापर्यंतची सर्वात मोठी 'ओपनिंग' नोंदवली आहे. एकीकडे सिनेमाच्या या विक्रमी कमाईने सर्वांचे डोळे विस्फारले आहेत, तर दुसरीकडे पहिल्या भागापासून प्रेक्षकांना सतावणारे एक मोठे कोडे अखेर सुटले आहे.
'धुरंधर'च्या पहिल्या भागात एका गूढ नावाची सतत चर्चा होती. दहशतवादी कारवायांचा मुख्य सूत्रधार आणि पडद्यामागून सर्व सूत्रे हलवणारा 'बडे साहब' नक्की कोण? हा प्रश्न चाहत्यांच्या मनात घर करून होता. सोशल मीडियावर याबद्दल अनेक तर्कवितर्क लावले जात होते. अखेर 'धुरंधर 2' मध्ये या रहस्यमयी पात्रावरील पडदा उठला असून, प्रेक्षकांचा अंदाज अगदी खरा ठरला आहे. हा 'बडे साहब' दुसरा-तिसरा कोणी नसून कुख्यात अंडरवर्ल्ड डॉन दाऊद इब्राहिम आहे, हे आता स्पष्ट झाले आहे.
या बहुचर्चित सिनेमात गँगस्टर दाऊद इब्राहिमची ही आव्हानात्मक भूमिका रंगभूमीवरील कसलेले अभिनेते दानिश इकबाल याने साकारली आहे. विशेष म्हणजे, या भूमिकेभोवती दिग्दर्शक आदित्य यांनी इतकी गुप्तता बाळगली होती की, खुद्द दानिशला सुद्धा आपणच 'बडे साहब' आहोत, याचा काहीच पत्ता नव्हता. शूटिंग सुरू होण्याच्या अवघे दोन महिने आधीपर्यंत दानिश या सत्यापासून पूर्णपणे अनभिज्ञ होता.
एका नुकत्याच दिलेल्या मुलाखतीत खुलासा करताना दानिशने सांगितले की, "मला दाऊदची भूमिका करायची आहे हे माहीत होते, पण तोच दाऊद सिनेमातला मुख्य 'बडे साहब' आहे, हे दिग्दर्शकाने माझ्यापासूनही शिताफीने लपवून ठेवले होते."
सिनेमाच्या सेटवरील किस्से सांगताना दानिश पुढे म्हणाला की, "सेटवर सर्वजण मला 'दाऊद भाई' किंवा 'साहेब' अशी हाक मारायचे, पण माझ्या खऱ्या पात्राच्या गुपिताबद्दल कुणीच शब्द काढला नाही. हळूहळू मलाच या गोष्टीचा अंदाज येऊ लागला होता." रंगभूमीवर त्याच्या अभिनयाचा ठसा उमटवणाऱ्या दानिश याच्यासाठी रुपेरी पडद्यावर एवढी मोठी आणि नकारात्मक छटा असलेली भूमिका साकारणे हा एक वेगळाच अनुभव होता. त्याने आतापर्यंत अनेक दिग्गजांना अशा भूमिका ताकदीने साकारताना पाहिले होते, पण स्वतःसाठी सिनेमात काम करण्याचा हा पहिलाच आणि तितकाच थरारक अनुभव असल्याचे त्याने कबूल केले आहे.
रणवीर सिंग, आर. माधवन, अर्जुन रामपाल, संजय दत्त आणि सारा अर्जुन अशा तगड्या स्टारकास्टने सजलेला हा सिनेमा सध्या सिनेमागृहांमध्ये प्रेक्षकांसाठी आनंद खेचून आणत आहे. दिग्दर्शकाची कल्पकता, कलाकारांचा दर्जेदार अभिनय आणि कथेतील खिळवून ठेवणारा सस्पेन्स यामुळे हा चित्रपट प्रेक्षकांच्या पसंतीस उतरत आहे. 'बडे साहब'च्या खुलाशामुळे सिनेमाची रंगत आणखी वाढली असून, आगामी काळात हा चित्रपट कमाईचे आणखी कोणते नवे विक्रम रचतो, हे पाहणे औत्सुक्याचे ठरणार आहे.
