कसाबच्या भूमिकेनंतर आता विद्रोही कवी नामदेव ढसाळ! ललित प्रभाकरच्या ‘ढसाळ’ चित्रपटाचा अंगावर काटा आणणारा टीझर प्रदर्शित

मराठी सिनेसृष्टीतील अष्टपैलू अभिनेता ललित प्रभाकर याने सातत्याने आपल्या वैविध्यपूर्ण भूमिकांनी प्रेक्षकांना अचंबित केले आहे. उज्ज्वल निकम यांच्या जीवनावरील ‘प्रहार’ या चित्रपटात दहशतवादी कसाबची नकारात्मक भूमिका साकारून आपल्या कसदार अभिनयाचा ठसा उमटवल्यानंतर, आता तो एका अत्यंत आव्हानात्मक आणि भव्य व्यक्तिरेखेत प्रेक्षकांच्या भेटीस येत आहे. दलित पँथर चळवळीचे संस्थापक आणि महान विद्रोही कवी पद्मश्री नामदेव ढसाळ यांच्या जीवनप्रवासावर आधारित ‘ढसाळ’ या बहुप्रतीक्षित चरित्रपटाचा टीझर नुकताच प्रदर्शित करण्यात आला आहे. या टीझरमधील ललित प्रभाकरचा बंडखोर अंदाज, आक्रमक संवादफेक आणि प्रभावी वावर पाहून चित्रपटसृष्टीसह प्रेक्षकांमध्ये प्रचंड उत्सुकता निर्माण झाली आहे.

प्रख्यात तंत्रज्ञ आणि दिग्गजांची साथ

संजय पांडेय आणि दि बायोस्कोप फिल्म्स प्रस्तुत, वरुणा मदनलाल राणा निर्मित या चित्रपटाचे लेखन व दिग्दर्शन स्वतः वरुणा राणा यांनी केले आहे. या चित्रपटासाठी प्रताप गंगावणे यांनी अत्यंत धारदार संवाद लिहिले असून, प्रसिद्ध रंगभूषाकार श्रीकांत देसाई यांनी ललित प्रभाकरला नामदेव ढसाळ यांचा हुबेहूब लूक दिला आहे. विशेष म्हणजे या चित्रपटाला दाक्षिणात्य सिनेसृष्टीतील महान संगीतकार इलैयाराजा यांचे संगीत लाभले असून, बॉलिवूडचे दिग्गज गीतकार इर्शाद कामील आणि मराठीतील प्रसिद्ध कवी गुरू ठाकूर यांनी यातील गाणी रचली आहेत. या दिग्गज कलाकारांच्या एकत्रित संगमामुळे या चित्रपटाची निर्मितीमूल्ये अत्यंत उच्च दर्जाची झाली आहेत.

अन्याय आणि शोषणाविरुद्धच्या संघर्षाची गाथा

नामदेव ढसाळ यांनी आपल्या विद्रोही लेखणीतून आणि सामाजिक चळवळीतून समाजातील अन्याय, शोषण आणि विषमतेविरुद्ध मोठा लढा उभारला होता. त्यांनी पेटवलेली क्रांती आणि समाजमनाला हादरवून टाकणारे विचार ‘ढसाळ’ या चित्रपटाच्या माध्यमातून अत्यंत वास्तववादी पद्धतीने रुपेरी पडद्यावर मांडले जाणार आहेत.

हेही वाचा – टायगर श्रॉफ प्रकरणात खळबळजनक खुलासा; 8 आरोपींना अटक, दिल्ली ते हरियाणापर्यंत कनेक्शन उघड

कसाबच्या पात्रातून प्रेक्षकांची चीड आणि कौतुक एकाच वेळी मिळवणाऱ्या ललित प्रभाकरने आता नामदेव ढसाळ यांच्या रूपातील वादळी संघर्ष तितक्याच समर्थपणे पेलल्याचे टीझरवरून स्पष्ट होत आहे. लवकरच हा चित्रपट प्रेक्षकांच्या भेटीस येणार असून, एका ऐतिहासिक क्रांतीची गाथा अनुभवण्यासाठी चित्रपटप्रेमी उत्सुक आहेत.