मुंबई: दोन दशकांची प्रतीक्षा, हजारो चाहत्यांची धडधड… आणि अखेर मंचावर पुन्हा एकदा शकीरा! लॅटिन पॉपची ही जागतिक सुपरस्टार एप्रिल 2026 मध्ये भारतात परतत आहे. 1 मार्चपासून तिकीट विक्री सुरू होताच उत्साहाच्या लाटा उसळल्या खऱ्या पण चर्चेचा खरा विषय ठरले ते तब्बल 32,000 रुपयांपर्यंत गेलेले तिकीट दर.
शकीरा 10 एप्रिल 2026 रोजी मुंबईतील महालक्ष्मी रेसकोर्स येथे, तर 15 एप्रिल रोजी दिल्लीतील जवाहरलाल नेहरू स्टेडियममध्ये सादरीकरण करणार आहे. 2007 मधील ‘Oral Fixation Tour’नंतर भारतातील हा तिचा पहिलाच दौरा असल्याने चाहत्यांमध्ये उत्सुकता शिगेला पोहोचली आहे. जवळपास 19 वर्षांनंतर होणारी ही पुनरागमनाची मैफल केवळ कॉन्सर्ट नसून चाहत्यांसाठी भावनिक पुनर्भेट ठरणार आहे.
मुंबई शोसाठी तिकीटांचे विविध पर्याय जाहीर करण्यात आले आहेत. सर्वाधिक महाग एचएसबीसी स्टारस्ट्रक लाउंज पास (HSBC Starstruck Lounge Pass) सुमारे 32,000 रुपयांचा आहे. यात 28,500 रुपयांचे बेस तिकीट, 200 रुपयांचे डिलिव्हरी शुल्क आणि GSTसह 3,363 रुपयांचे बुकिंग शुल्क समाविष्ट आहे.
याशिवाय प्लॅटिनम लाउंज (Platinum Lounge) 24,500 रुपये, VIP सेक्शन 14,500 रुपये आणि सामान्य प्रवेश 6,000 रुपये असे पर्याय उपलब्ध आहेत (अतिरिक्त शुल्क वेगळे). दिल्लीतील स्टारस्ट्रक लाउंज पास सुमारे 30,500 रुपयांपर्यंत ठेवण्यात आला आहे. दर जरी उच्च असले तरी मागणी मात्र तितकीच जोरदार दिसत आहे.
हेही वाचा: Ginger Garlic Paste : तुमच्या स्वयंपाकघरात भेसळयुक्त आलं-लसूण पेस्ट तर नाही ना? घरच्या घरी करा 5 सोप्या टेस्ट
प्रीमियम पासधारकांसाठी आयोजकांनी ‘लक्झरी लाईव्ह म्युझिक एक्सपीरियन्स’ची आखणी केली आहे. VIP लाउंज प्रवेश, मर्यादित फॅन पीट ॲक्सेस, समर्पित शटल सेवा, स्वतंत्र प्रवेशमार्ग, विशेष उभे राहण्याची जागा, प्रीमियम फूड स्टॉल्स आणि कॉम्प्लिमेंटरी पेय सुविधा या सर्व गोष्टी अनुभवाला वेगळीच झळाळी देणार आहेत. म्हणजेच, हा कार्यक्रम केवळ गाण्यांचा नव्हे, तर संपूर्ण अनुभवाचा उत्सव ठरणार आहे.
या दौऱ्याला सामाजिक ध्येयाची जोडही देण्यात आली आहे. शकीराने भारतातील चाहत्यांशी संवाद साधताना बाल पोषणाबाबत जागरूकता निर्माण करण्याची आणि संयुक्त राष्ट्रांच्या Zero Hunger Mission 2030 ला पाठिंबा देण्याची भूमिका स्पष्ट केली आहे. हा उपक्रम Feeding India आणि डिस्ट्रिक्ट बाय झोमॅटो यांच्या सहकार्याने राबवला जात आहे. मनोरंजनासोबत सामाजिक जबाबदारीचा संदेश देण्याचा हा प्रयत्न विशेष उल्लेखनीय मानला जातो.
एकूणच, संगीत, सामाजिक बांधिलकी आणि भव्य आयोजन यांचा संगम असलेला शकीराचा भारत दौरा एप्रिल महिन्यातील सर्वात चर्चेचा कार्यक्रम ठरणार आहे. तिकीटांचे दर जरी ‘हाय नोट’वर असले तरी चाहत्यांचा उत्साह त्याहूनही उंच सुरात आहे आणि मंचावर शकीरा उभी राहिल्यावर त्या प्रत्येक रुपयाचे मोल ठरणार, यात शंका नाही.
हेही वाचा: Sudhakar Shrotri Passes Away: पुष्कर श्रोत्रीचे पितृछत्र हरपले; 89व्या वर्षी वडिलांनी घेतला अखेरचा श्वास