Check Bounce Case : चेक बाऊन्स प्रकरणामुळे सध्या तिहार तुरुंगात असलेल्या अभिनेता राजपाल यादवला चित्रपटसृष्टीतून मोठा पाठिंबा मिळाला आहे. संकटकाळात लोकांच्या मदतीला धावून जाणारा अभिनेता सोनू सूद आता राजपाल यादवच्या समर्थनासाठी पुढे आला आहे. राजपाल यादव सध्या गंभीर कायदेशीर आणि आर्थिक संकटाचा सामना करत असताना, सोनू सूदने त्याला आपल्या आगामी चित्रपटात काम देण्याची घोषणा केली आहे. "ही मदत नसून एका प्रतिभावान कलाकाराचा सन्मान आहे," अशा शब्दांत सोनू सूदने आपली भूमिका स्पष्ट केली आहे.
व्यावसायिक आदर आणि सोनू सूदचे आवाहन
सोशल मीडिया प्लॅटफॉर्म 'X' वर आपली भूमिका मांडताना सोनू सूदने राजपाल यादवला एक अत्यंत प्रतिभावान अभिनेता म्हटले आहे, ज्याने हिंदी चित्रपटसृष्टीत अनेक वर्षे संस्मरणीय योगदान दिले आहे. सोनू सूदने स्पष्ट केले की, तो राजपालला आपल्या आगामी चित्रपटात कास्ट करत असून त्याला एक 'साइनिंग अमाऊंट' देखील देत आहे. ही रक्कम भविष्यातील कामाच्या मानधनाशी संबंधित असेल. "जेव्हा आपल्यातील एखादा कलाकार संघर्षात असतो, तेव्हा निर्माते आणि सहकाऱ्यांनी एकत्र उभे राहणे आवश्यक आहे," असे आवाहनही त्याने उद्योगातील इतर लोकांना केले आहे.
काय आहे नेमकं प्रकरण आणि कायदेशीर पेच?
राजपाल यादव यांच्या कायदेशीर अडचणींची सुरुवात 2010 मध्ये झाली होती. त्यांनी त्यांच्या 'अता पता लापता' या चित्रपटासाठी मुरली प्रोजेक्ट्स प्रायव्हेट लिमिटेडकडून 5 कोटी रुपयांचे कर्ज घेतले होते. मात्र, चित्रपट फ्लॉप झाल्यामुळे कर्जाची परतफेड करणे कठीण झाले. कर्ज फेडण्यासाठी दिलेले अनेक चेक बाऊन्स झाले, ज्यामुळे त्यांच्यावर निगोशिएबल इन्स्ट्रुमेंट्स कायद्याच्या कलम 138 अंतर्गत कारवाई करण्यात आली. एप्रिल 2018 मध्ये दंडाधिकारी न्यायालयाने त्यांना आणि त्यांच्या पत्नीला दोषी ठरवून सहा महिन्यांच्या तुरुंगवासाची शिक्षा सुनावली होती.
हेही वाचा - Rakhi Sawant in Bigg Boss Season 6 : 'बिग बॉस'मध्ये वाइल्ड कार्ड एन्ट्री, राखी सावंतचा खेळ रंगणार, स्पर्धकांमध्ये वाढली धाकधूक
थकबाकी वाढली आणि उच्च न्यायालयाचा कठोर निर्णय
अनेक अपीलांनंतर आणि 2025 मध्ये भरलेल्या सुमारे 2.75 कोटी रुपयांच्या आंशिक परतफेडीनंतरही, व्याजासह थकबाकीची रक्कम आता तब्बल 29 कोटी रुपयांपर्यंत वाढली आहे. 4 फेब्रुवारी 2026 रोजी दिल्ली उच्च न्यायालयाने निधीची व्यवस्था करण्यासाठी आणखी वेळ देण्यास नकार दिला. न्यायमूर्ती स्वर्ण कांता शर्मा यांनी यादव यांना आत्मसमर्पण करण्याचे निर्देश दिले. आत्मसमर्पण करण्यापूर्वी राजपाल यादव भावूक झाले होते; "माझ्याकडे आता पैसे उरलेले नाहीत आणि या संकटात मी स्वतःला एकटे समजत आहे," अशी खंत त्यांनी व्यक्त केली होती. अशा परिस्थितीत सोनू सूदने दिलेला मदतीचा हात त्यांच्यासाठी मोठा आधार ठरला आहे.