ज्येष्ठ तेलुगू अभिनेते आणि आंध्रचे माजी आमदार कोटा श्रीनिवास राव यांचे निधन

हैदराबाद: प्रसिद्ध टॉलिवूड अभिनेते आणि पद्मश्री पुरस्कार विजेते कोटा श्रीनिवास राव यांचे रविवारी पहाटे वयाच्या 83 व्या वर्षी हैदराबाद येथे निधन झाले. त्यांच्या पश्चात त्यांची पत्नी रुक्मिणी आणि दोन मुली आहेत. त्यांना एक मुलगा होता. परंतु, त्याचा 2010 मध्ये हैदराबादमध्ये एका दुःखद रस्ते अपघातात मृत्यू झाला. खलनायक, चरित्र अभिनेता आणि कधीकधी विनोदी कलाकार अशा बहुमुखी अभिनयासाठी ओळखल्या जाणाऱ्या या ज्येष्ठ अभिनेत्याने तेलुगू चित्रपटसृष्टीत अमिट छाप पाडली. त्यांनी तमिळ, हिंदी, कन्नड आणि मल्याळम चित्रपटांमध्येही काम केले. 

कोटा श्रीनिवास राव यांनी एकूण 750 चित्रपटांमध्ये काम केले, ज्यात 30 तमिळ, 10 हिंदी, 8 कन्नड आणि एका मल्याळम चित्रपटांचा समावेश आहे. 2023 मध्ये प्रदर्शित झालेला सुवर्ण सुंदरी हा चित्रपट त्यांचा शेवटचा तेलुगू चित्रपट होता. 10 जुलै 1942 रोजी आंध्र प्रदेशातील कृष्णा जिल्ह्यातील कांकीपाडू येथे जन्मलेले कोटा हे एका सांस्कृतिकदृष्ट्या समृद्ध कुटुंबातील होते. त्यांची आई कोटा सीताराम अनसुयम्मा यांनी त्यांना लहानपणापासूनच अभिनयाची आवड निर्माण करण्यास प्रोत्साहन दिले. त्यांनी त्यांच्या विद्यार्थीदशेतच रंगमंच नाटकांमध्ये काम करण्यास सुरुवात केली.

हेही वाचा – बिग बॉस फेम अब्दु रोजिकला दुबई पोलिसांकडून अटक; काय आहे प्रकरण? जाणून घ्या

पद्मश्री पुरस्काराने सन्मानित – 

चित्रपटसृष्टीत प्रवेश करण्यापूर्वी, त्यांनी नाट्यप्रयोगांमध्ये भाग घेत स्टेट बँक ऑफ इंडियामध्ये काम केले. 1978 मध्ये प्रदर्शित झालेल्या प्रणम खारीदू या चित्रपटातून त्यांनी तेलुगू चित्रपटसृष्टीत पदार्पण केले. ते पुढे तेलुगू चित्रपटसृष्टीतील सर्वात लोकप्रिय सहाय्यक अभिनेत्यांपैकी एक बनले. अभिनयाव्यतिरिक्त, त्यांनी काही तेलुगू चित्रपटांमध्येही गायन केले. कोटा यांना त्यांच्या अभिनयासाठी आंध्र प्रदेश सरकारकडून नऊ प्रतिष्ठित नंदी पुरस्कार मिळाले. 2015 मध्ये त्यांना पद्मश्रीने सन्मानित करण्यात आले.

हेही वाचा – कॅनडामधील कपिल शर्माच्या कॅफेमध्ये गोळीबार; 'या' दहशतवाद्याने स्विकारली जबाबदारी

चित्रपटसृष्टीतील कामगिरीव्यतिरिक्त त्यांनी राजकारणातही आपला ठसा उमठवला. भारतीय जनता पक्षाचे (भाजप) प्रतिनिधित्व करताना, ते विजयवाडा पूर्व मतदारसंघातून आमदार म्हणून निवडून आले. 1999 ते 2004 पर्यंत त्यांनी काम केले. आंध्र प्रदेशचे मुख्यमंत्री एन. चंद्राबाबू नायडू, उपमुख्यमंत्री पवन कल्याण, तेलंगणाचे मुख्यमंत्री ए. रेवंत रेड्डी आणि अनेक टॉलीवूड चित्रपट क्षेत्रातील मान्यवरांनी कोटा श्रीनिवास राव यांच्या निधनाबद्दल शोक व्यक्त केला आहे.