Air India Cutting Chai: 35,000 फूट उंचीवर आता मिळणार ‘कटिंग चहा’; एअर इंडियाचा आंतरराष्ट्रीय प्रवाशांसाठी आगळावेगळा निर्णय

Air India Cutting Chai: टाटा समूहाच्या एअर इंडियाने आंतरराष्ट्रीय प्रवासादरम्यान प्रवाशांना घरच्या चहाचा अस्सल स्वाद देणारा एक आगळावेगळा निर्णय घेतला आहे. मुंबईच्या प्रसिद्ध ‘कटिंग चहा’ची चव आता थेट 35,000 फूट उंचीवर उडणाऱ्या आंतरराष्ट्रीय विमानांमध्ये प्रवाशांना चाखायला मिळणार आहे. दीर्घ पल्ल्याच्या प्रवासात येणारा थकवा आणि शीण दूर व्हावा, तसेच प्रवाशांचा हवाई सफरीचा अनुभव अधिक सुखकर व आठवणीत राहण्याजोगा व्हावा, या उद्देशाने एअर इंडियाने ही खास वैशिष्ट्यपूर्ण सेवा सुरू केली आहे.

‘बेस्ट ऑनबोर्ड बेव्हरेज’ पुरस्काराने सन्मानित; ‘टाटा कंझ्युमर’चा विशेष सहभाग
टाटा कंझ्युमर प्रॉडक्ट्स लिमिटेडच्या सहकार्याने विकसित करण्यात आलेल्या या सुगंधी मसाला कटिंग चहाला आंतरराष्ट्रीय स्तरावर विशेष मान्यता मिळाली आहे. ‘एअरलाइन पॅसेंजर एक्सपीरियन्स असोसिएशन’ने (APEX) या चहाला जागतिक दर्जाचा ‘बेस्ट ऑनबोर्ड बेव्हरेज’ (Best Onboard Beverage) पुरस्कार देऊन गौरवले आहे. भारतातील गल्लीबोळात अन् रस्त्यांवरील टपरीवर मिळणाऱ्या कटिंग चहाच्या धर्तीवरच हा मसाला चहा तयार केला असून, यात दालचिनी, वेलची व इतर भारतीय मसाल्यांचा उत्तम स्वाद प्रवाशांना अनुभवायला मिळेल.

हेही वाचा – Hiring Policy: ‘प्रांतीय भेदभाव की सुरक्षा?’ या 4 राज्यांतील पुरुषांना थेट नोकरीच नाकारली; बंगळुरूच्या CEO च्या पोस्टने सोशल मीडियावर चर्चांना उधाण

आंतरराष्ट्रीय मार्गांवरील फर्स्ट अन् बिझनेस क्लाससाठी सेवा उपलब्ध
हा खास मसाला कटिंग चहा सध्यातरी एअर इंडियाच्या आंतरराष्ट्रीय मार्गांवरील ‘फर्स्ट क्लास’ (First Class) आणि ‘बिझनेस क्लास’ (Business Class) कॅबिनमधील प्रवाशांसाठी उपलब्ध करून देण्यात आला आहे. भारतीय प्रवाशांना त्यांच्या परिचित स्वादाने आपुलकीची भावना मिळावी आणि त्याच वेळी परदेशी पर्यटकांना भारतातील लोकप्रिय खाद्यसंस्कृतीची ओळख व्हावी, असा दुहेरी हेतू यामागे आहे. टाटा समूह एअर इंडियाच्या माध्यमातून भारतीय खाद्यसंस्कृतीचा वारसा जागतिक स्तरावर नेण्याचा प्रयत्न करत आहे.

कट्टा संस्कृती अन् भावनिक संवादाचा भाग बनलेला कटिंग चहा
भारतात चहा म्हणजे केवळ एक पेय नसून तो रोजच्या संवादाचा, राजकारणाचा आणि कट्टा संस्कृतीचा अविभाज्य भाग मानला जातो. अर्ध कप चहा म्हणजेच ‘कटिंग चहा’ पिऊन कामाचा ताण हलका करण्याची परंपरा संपूर्ण देशात लोकप्रिय आहे. फ्लाईटमधील दीर्घ प्रवासात किंवा वेटिंगदरम्यान प्रवाशांना ताजेतवाने ठेवण्यासाठी ही संकल्पना अत्यंत उपयुक्त ठरेल. या चहाच्या माध्यमातून जागतिक पटलावर भारतीय आदरातिथ्याचा आणि चहाप्रेमाचा गोडवा अधिक समृद्ध होणार आहे.

हेही वाचा – Nashik: नाशिकमध्ये भेसळयुक्त गुळाचा मोठा साठा जप्त; FDAची सणासुदीच्या पार्श्वभूमीवर मोठी कारवाई