भीषण अपघात! बायपास रोडवर एकापेक्षा जास्त वाहनांनी एकमेकांना धडक; वाहने जळून खाक, 4 जणांचा होरपळून मृत्यू

गुवाहाटी : आसामच्या तिनसुकिया जिल्ह्यातील डुमडुमा पोलीस ठाण्याच्या हद्दीत असलेल्या सामडुंग बायपासवर, शनिवारी संध्याकाळी चहाची ताजी पाने घेऊन जाणारे एक भरधाव वाहन अनेक वाहनांना धडकले. या अपघातानंतर लागलेल्या आगीत घटनास्थळी असलेली काही वाहने जळून खाक झाली. या दुर्घटनेत चार जण ठार, तर दोन जण जखमी झाले आहेत. तिनसुकियाचे वरिष्ठ पोलीस अधीक्षक (SSP) मयंक कुमार झा यांनी प्राथमिक मृतांच्या संख्येला दुजोरा दिला आहे. मात्र, अधिक माहिती समोर आल्यानंतर या आकड्यांत बदल होऊ शकतो, असेही त्यांनी स्पष्ट केले. “सध्या मिळालेल्या प्राथमिक माहितीनुसार, चार जणांचा मृत्यू झाला असून दोन जण जखमी झाले आहेत. अधिक तपशीलांची पडताळणी सुरू आहे. मृतांच्या संख्येत बदल होऊ शकतो,” असे झा यांनी सांगितले.

हेही वाचा : राष्ट्रवादीचे नेते मुख्यमंत्र्यांच्या भेटीला; अर्थखात्याच्या मागणीवर चर्चा की मंत्रिमंडळात बदल? काय आहे भेटीमागील कारण?

घटनेची माहिती मिळताच वरिष्ठ पोलीस अधीक्षकांनी घटनास्थळी भेट दिली. पोलीस आणि आपत्कालीन पथके परिस्थिती हाताळण्याचे काम करत असताना त्यांनी संपूर्ण बचाव कार्यावर देखरेख ठेवली. आग नेमकी कशामुळे लागली हे अद्याप स्पष्ट झालेले नाही. पोलीस आता तांत्रिक तपासणीच्या अहवालाची वाट पाहत आहेत. “नेमके काय घडले, याचा तपास सुरू आहे. तुम्ही पाहू शकता की वाहनांना आग लागली आहे. तांत्रिक तपासणीतूनच आग लागण्याचे नेमके कारण समोर येईल,” असे झा म्हणाले. प्राथमिक अहवालांनुसार, चहाची पाने घेऊन जाणारे वाहन एका ‘थार’ (Thar) गाडीला, एका मोटारसायकलला आणि एका पादचाऱ्याला धडकले. धडक बसल्यानंतर वाहनांना आग लागली. ज्यामध्ये मोटारसायकल पूर्णपणे जळून खाक झाली. मृत व्यक्तींपैकी तिघांची ओळख सुब्रत भट्टाचार्जी, पिंटू तांती आणि गणेश प्रजा अशी पटली आहे. चौथ्या व्यक्तीची ओळख अद्याप पटलेली नाही. मृतांबद्दल अधिक माहिती आणि जखमींची प्रकृती कशी आहे, हे अद्याप समजू शकलेले नाही.

आग विझवण्यासाठी अग्निशमन दल आणि आपत्कालीन सेवांची पथके तातडीने घटनास्थळी पोहोचली. या अपघातामुळे परिसरात तणावाचे वातावरण निर्माण झाले होते. ज्यामुळे कायदा व सुव्यवस्था राखण्यासाठी पोलिसांना तैनात करण्यात आले. या दुर्दैवी घटनेवर स्थानिक संघटनांनी तीव्र प्रतिक्रिया दिली आहे. ‘ऑल आसाम टी ट्राईब्स स्टुडंट्स असोसिएशन’ (ATTSA), डुमडुमाच्या नेत्यांनी या घटनेबद्दल धक्का व्यक्त केला असून, तिनसुकियाचे जिल्हा आयुक्त सुमित सट्टावान यांना घटनास्थळी भेट देण्याचे आवाहन केले आहे. “या अपघाताने सॅमडुंग बायपासवरील पादचाऱ्यांच्या सुरक्षिततेबाबत गंभीर प्रश्न निर्माण केले आहेत. या भीषण अपघातातील जीवितहानीमुळे स्थानिक संघटनांमध्ये संतापाची लाट आहे. प्रशासनाने पादचाऱ्यांची सुरक्षा सुनिश्चित करावी आणि रस्ते सुरक्षेसाठी आवश्यक उपाययोजना लवकरात लवकर कराव्यात, अशी आमची मागणी आहे,” असे संबंधित नेत्याने म्हटले. या अपघातामुळे सॅमडुंग बायपासवरील रस्ते सुरक्षेबाबत पुन्हा चिंता व्यक्त केली जात आहे. या मार्गावर यंदा अनेक अपघात घडले असून, त्यात अनेकांना प्राण गमवावे लागले आहेत. ताज्या घटनेमुळे पादचारी आणि वाहनचालकांच्या संरक्षणासाठी तातडीने सुरक्षा उपाययोजना करण्याची मागणी अधिक तीव्र झाली आहे. अपघात नेमका कसा घडला आणि त्यानंतर वाहनाला आग कशी लागली. याचा तपास पोलीस करत आहेत.

महाराष्ट्र ते देश-विदेश, ताज्या घडामोडी एका क्लिकवर