Delhi Blast Update: दिल्लीतील कार बॉम्बस्फोटानंतर सुरू झालेल्या तपासात आता धक्कादायक माहिती समोर आली आहे. अटक करण्यात आलेले दोघे डॉक्टर आदिल अहमद आणि मुझम्मिल हे पाकिस्तानस्थित दहशतवादी संघटना जैश-ए-मोहम्मदसाठी काम करत असल्याचे उघड झाले आहे. सूत्रांच्या माहितीनुसार, या दोघांचा थेट संबंध मसूद अझहरच्या भावाशी मौलाना अम्मार अल्वी उर्फ मोहिउद्दीन आलमगीर याच्याशी होता. तोच सहारनपूर–फरिदाबाद आत्मघाती मॉड्यूलचा मास्टरमाइंड असल्याची शक्यता तपासात व्यक्त करण्यात आली आहे.
पाकिस्तानी हँडलरशी संपर्क
तपासात आदिल आणि मुझम्मिल यांनी चौकशीत कबूल केले की, पाकिस्तानातील जैश-ए-मोहम्मदच्या एका हँडलरने त्यांच्याशी टोपणनावाने संपर्क साधला होता. त्यांच्याकडून स्फोटक साहित्य जमा करण्याचे आदेश देण्यात आले होते. मात्र, चौकशीत त्यांनी कोणतेही विशिष्ट लक्ष्य दिल्याचे नाकारले आहे. सुरक्षा संस्थांकडून त्या हँडलरची खरी ओळख पटवण्याचे काम सुरू आहे.
उच्च गुप्तचर अधिकाऱ्यांच्या माहितीनुसार, 2016 पासून मसूद अझहरचा भाऊ अम्मार अल्वी हा जैशच्या आत्मघाती मॉड्यूलचा प्रमुख म्हणून काम करत आहे. त्याने भारतीय भूमीवर आयईडी तयार करण्याचे आणि वापरण्याचे प्रशिक्षण दिले होते. “ऑपरेशन सिंदूर”नंतर जैशने धोरण बदलले आणि आता पाकिस्तानी नागरिकांचा सहभाग लपवण्यासाठी भारतातील नागरिकांना दहशतवादी हल्ल्यांसाठी वापरण्याचा प्रयत्न केला जात आहे.
काश्मीरमधील जिहादसाठी भडकवणारा प्रचार
गुप्तचर संस्थांच्या माहितीनुसार, 6 नोव्हेंबरपासून मसूद अझहर काश्मिरी युवकांना ‘धार्मिक लढाई’च्या नावाखाली भडकावणाऱ्या नोट्स प्रसिद्ध करत आहे. आतापर्यंत अशा 6 प्रचार पत्रिका समोर आल्या आहेत. त्यानंतर भारतीय एजन्सींनी संशयित डॉक्टरांच्या फोनमध्ये आढळलेल्या सुमारे 30 पाकिस्तानी नंबरचा तपास सुरू केला आहे.
अम्मार अल्वी आधीच घोषित दहशतवादी
दरम्यान, 2019 मधील पुलवामा हल्ल्याचा मुख्य सूत्रधार असलेला मौलाना अम्मार अल्वीला 2022 पासून UAPA अंतर्गत दहशतवादी म्हणून घोषित करण्यात आले आहे. त्याच्याशी संबंधित नेटवर्क पुन्हा सक्रिय झाल्याची चिन्हे या घटनेतून स्पष्ट होत आहेत.
