CJP Dance Video Controversy : केंद्रीय शिक्षणमंत्री धर्मेंद्र प्रधान यांना आपल्या पदाचा राजीनामा द्यावा लागला. पंतप्रधान नरेंद्र मोदी यांच्या 12 वर्षांच्या कार्यकाळात राजीनामा देणारे प्रधान हे पहिलेच मंत्री ठरले. कॉकरोच जनता पार्टीने (CJP) जंतर-मंतरवर उभारलेल्या या आंदोलनापुढे झुकत सरकारने बहुतांश मागण्या मान्य केल्या. मात्र, या निर्णयाच्या पाठोपाठ CJP च्या कार्यकर्त्यांनी एका हॉटेलमध्ये एकत्र येत नाचगाणी करत मोठा जल्लोष साजरा केला. या उत्सवाचा व्हिडिओ सोशल मीडियावर प्रचंड व्हायरल झाल्यानंतर भारतीय जनता पक्षाच्या आयटी सेलचे प्रमुख अमित मालवीय यांनी त्यावर जोरदार आक्षेप नोंदवला आहे.
21 विद्यार्थ्यांच्या आत्महत्येनंतर असा जल्लोष असंवेदनशील: अमित मालवीय
अमित मालवीय यांनी हा व्हिडिओ सोशल मीडियावर शेअर करत आंदोलकांच्या हेतूवर आणि नैतिकतेवर मोठे प्रश्न उपस्थित केले. ‘प्रत्येक व्यक्तीला कष्टानंतर आनंद साजरा करण्याचा अधिकार नक्कीच असतो, परंतु उत्सवाची वेळ आणि जागा अत्यंत महत्त्वाची असते,’ असे त्यांनी नमूद केले. NEET गैरव्यवहारामुळे देशभरात 21 निष्पाप विद्यार्थ्यांनी आत्महत्या केल्याच्या पार्श्वभूमीवर हे आंदोलन सुरू झाले होते. अशा अत्यंत गंभीर परिस्थितीत एका बाजूला पीडित कुटुंबे दुःखात असताना दुसरीकडे आंदोलक हॉटेलमध्ये डान्स करून आनंद व्यक्त करत आहेत, हे कृत्य कमालीचे असंवेदनशील असल्याचे मालवीय यांनी स्पष्ट केले.
विजेता दहिया, सौरव आणि रांका यांच्या डान्सवर भाजपचा हल्लाबोल
मालवीय यांनी आपल्या पोस्टमध्ये आंदोलनातील प्रमुख चेहरे असणाऱ्या सदस्यांवर थेट निशाणा साधला. काही दिवसांपूर्वीच व्यासपीठावरून विजेता दहिया यांचा डान्स करतानाचा व्हिडिओ समोर आला होता, आणि आता अभिजित दीपके यांच्या गटातील सौरव, रांका यांच्यासह इतर कार्यकर्ते जल्लोष करताना दिसत आहेत. आंदोलक नेते विद्यार्थ्यांच्या दुःखाचा आणि भावनांचा वापर स्वतःच्या राजकीय फायद्यासाठी आणि प्रसिद्धीसाठी करत असल्याचा घणाघाती आरोप भाजपकडून करण्यात आला आहे.
Everyone deserves to unwind and celebrate after a hard day’s work. But there is a time and a place for it. When a movement is presented as a fight for justice for students, including those whose deaths by suicide are invoked as its moral foundation, scenes of dancing and what… pic.twitter.com/vIz35PtYcn — Amit Malviya (@amitmalviya) July 27, 2026
प्रामाणिकपणे सहभागी झालेल्या तरुणांची दिशाभूल झाल्याचा दावा
या व्हायरल व्हिडिओमुळे शिक्षण व्यवस्थेत सुधारणा व्हावी म्हणून प्रामाणिकपणे आंदोलनात उतरलेल्या हजारो तरुणांमध्ये अत्यंत चुकीचा संदेश गेल्याचा दावा मालवीय यांनी केला. ज्या विद्यार्थ्यांनी या आंदोलनाला मनापासून पाठिंबा दिला, त्यांना आता आपली राजकीय फसवणूक झाल्याची जाणीव होईल, असे ते म्हणाले. ‘विद्यार्थ्यांच्या न्याय्य हक्कांच्या लढाईचे रूपांतर राजकीय प्रचारात करणाऱ्या या नेत्यांना आता आंदोलनात सहभागी झालेल्या सामान्य तरुणांना उत्तर द्यावे लागेल,’ असा इशाराही त्यांनी दिला.
