Abhijeet Dipke Receives Death Threats : सोशल मीडियावरील सध्याची देशातील सर्वात मोठी डिजिटल आणि व्यंगात्मक राजकीय चळवळ असलेल्या ‘कॉक्रोच जनता पार्टी’चे (Cockroach Janta Party) संस्थापक अभिजीत दीपके यांना थेट जीवे मारण्याची धमकी मिळाल्याचा धक्कादायक प्रकार उघडकीस आला आहे. स्वतः अभिजीत दीपके यांनी आपल्या अधिकृत ‘X’ (पूर्वीचे ट्विटर) अकाउंटवरून यासंदर्भात एक पोस्ट शेअर करत ही माहिती उघड केली आहे. “Receiving death threats now” (आता मला जीवे मारण्याच्या धमक्या येत आहेत) असे लिहीत त्यांनी आपल्याला लक्ष्य केले जात असल्याचे सांगितले. गेल्या काही दिवसांत त्यांनी मांडलेल्या स्पष्ट राजकीय भूमिका आणि वाढती लोकप्रियता यामुळेच त्यांना अशा धमक्या येत असल्याचा प्राथमिक अंदाज वर्तवला जात आहे.
अवघ्या 3 दिवसांत 20 लाखांहून अधिक लोकांचा सहभाग
अभिजीत दीपके (वय 30 वर्षे) या मराठी तरुणाने सुरू केलेली ही डिजिटल चळवळ सध्या संपूर्ण देशात प्रचंड व्हायरल झाली आहे. सर्वोच्च न्यायालयाचे सरन्यायाधीश सूर्य कांत यांनी एका सुनावणीदरम्यान “काही बेरोजगार तरुण झुरळांप्रमाणे व्यवस्थेवर हल्ला करतात,” असे वक्तव्य केले होते. सरन्यायाधीशांच्या याच खळबळजनक वक्तव्यानंतर देशभरातील तरुणांमधून तीव्र पडसाद उमटले आणि त्यातूनच एका व्यंगात्मक निषेधाच्या रूपाने ‘कॉक्रोच जनता पार्टी’चा जन्म झाला. विशेष म्हणजे, ही मोहीम सुरू झाल्यानंतर अवघ्या 3 दिवसांत तब्बल 20 लाखांहून अधिक लोकांनी यामध्ये सहभाग नोंदवून या चळवळीला देशातील सर्वात मोठा डिजिटल ट्रेंड बनवले आहे.
सोशल मीडियावर तीव्र संताप आणि पोलिसांकडे कारवाईची मागणी
अभिजीत दीपके यांना मिळालेल्या या धमकीचे सोशल मीडियावर अत्यंत तीव्र पडसाद उमटले आहेत. केवळ वैचारिक मतभेद किंवा डिजिटल चळवळीमुळे थेट जीवे मारण्याची धमकी देण्याच्या या प्रवृत्तीवर नेटिझन्स, अनेक सामाजिक कार्यकर्ते आणि पत्रकारांनी तीव्र संताप व्यक्त केला आहे. ही घटना अभिव्यक्ती स्वातंत्र्यासाठी अत्यंत चिंताजनक असल्याचे युझर्सचे म्हणणे आहे. या प्रकरणाची गांभीर्याने दखल घेऊन धमकी देणाऱ्या अज्ञात व्यक्तीविरोधात तातडीने सायबर पोलिसांत (Cyber Police) गुन्हा दाखल करावा आणि अभिजीत यांना तात्काळ सुरक्षा पुरवावी, अशी मागणी नेटकऱ्यांकडून केली जात आहे.
Receiving death threats now. pic.twitter.com/agCy94jXEf — Abhijeet Dipke (@abhijeet_dipke) May 22, 2026
प्रमुख राजकीय नेत्यांचा मोहिमेला जाहीर पाठिंबा
सध्या सोशल मीडियाच्या विविध प्लॅटफॉर्मवर ‘कॉक्रोच जनता पार्टी’ची व्याप्ती आणि लोकप्रियता वेगाने वाढत आहे. सामान्य तरुण आणि बेरोजगारांच्या हक्कांसाठी डिजिटल पातळीवर आवाज उठवणाऱ्या या मोहिमेची दखल आता मुख्य प्रवाहातील राजकारण्यांनाही घ्यावी लागली आहे. देशातील काही प्रमुख आणि बड्या राजकीय नेत्यांनीही या चळवळीला आपला जाहीर पाठिंबा दर्शवला आहे. आता या धमकीच्या प्रकरणानंतर सायबर पोलीस आणि प्रशासन काय पावले उचलणार आणि धमकी देणाऱ्याचा छडा लावणार का, याकडे सोशल मीडियावरील लाखो पाठीराख्यांचे लक्ष लागले आहे.
