Delhi Protest: ‘NEET’ परीक्षेच्या प्रश्नपत्रिका फुटीच्या प्रकरणावरून देशभरात संतापाची लाट उसळली असून, या मुद्द्यावर काँग्रेसने थेट पंतप्रधान निवासस्थानाला घेराव घालत आक्रमक पवित्रा घेतला आहे. शिक्षणमंत्र्यांच्या राजीनाम्याची मागणी करत रस्त्यावर उतरलेल्या काँग्रेसच्या अनेक बड्या नेत्यांना पोलिसांनी ताब्यात घेतले आहे. देशाची शिक्षण व्यवस्था ढासळत असताना सरकार डोळे मिटून बसल्याचा आरोप यावेळी विरोधी पक्षांकडून करण्यात आला.
राहुल आणि प्रियंका गांधींचा सरकारवर थेट हल्ला; लाठीमाराचा तीव्र निषेध
लोकसभेचे विरोधी पक्षनेते राहुल गांधी आणि प्रियंका गांधी यांनी या आंदोलनाचे नेतृत्व केले. आंदोलक विद्यार्थ्यांवर काल झालेल्या पोलीस लाठीमाराचा तीव्र निषेध नोंदवत राहुल गांधी यांनी पंतप्रधान मोदींनी विद्यार्थ्यांची माफी मागावी, अशी मागणी केली. तत्पूर्वी, त्यांनी ‘RML’ रुग्णालयात जाऊन जखमी विद्यार्थ्यांची भेट घेतली. तसेच लोकसभा अध्यक्ष ओम बिर्ला यांची भेट घेऊन या गंभीर विषयावर संसदेत तत्काळ विशेष चर्चेची मागणी केली.
Lok Sabha LoP and Congress MP Rahul Gandhi tweets, "We have marched to PM Modi’s house to demand answers from him for the brutalities against young students yesterday. The Government doesn’t want to take any accountability or does it want to have a debate on it in Parliament. PM… pic.twitter.com/Nrp2L4JhSS — ANI (@ANI) July 21, 2026
फक्त शिक्षणमंत्री नव्हे, गृहमंत्र्यांनीही राजीनामा द्यावा – राहुल गांधी
या संपूर्ण प्रकरणाची जबाबदारी स्वीकारून केंद्रीय शिक्षणमंत्री धर्मेंद्र प्रधान यांनी आपल्या पदाचा राजीनामा दिलाच पाहिजे, असे सांगतानाच राहुल गांधी यांनी गृहमंत्रालयालाही धारेवर धरले. आंदोलक विद्यार्थ्यांवर झालेला लाठीमार हा गृहमंत्रालयाच्या संमतीशिवाय शक्य नाही, असा दावा करत त्यांनी शिक्षणमंत्र्यांसोबतच गृहमंत्री आणि पंतप्रधानांच्या राजीनाम्याची मागणी केली.
जंतरमंतर ते पंतप्रधान निवासापर्यंत आंदोलनाचे लोण; पोलिसांशी झटापट
दरम्यान, जंतरमंतर येथेही विविध विद्यार्थी संघटना आणि काँग्रेसच्या कार्यकर्त्यांकडून सातत्याने निदर्शने सुरू आहेत. आंदोलन चिघळल्याने काल पोलीस आणि आंदोलकांमध्ये मोठी झटापट व दगडफेक झाली होती. संसदेत चर्चा टाळण्यासाठी सरकार दडपशाहीचा मार्ग अवलंबत असल्याचा आरोप करत, देशव्यापी तरुणांच्या भवितव्याशी खेळणाऱ्या सरकारविरोधात लढा अधिक तीव्र करण्याचा इशारा काँग्रेसने दिला आहे.
