संयुक्त राष्ट्रांच्या अहवालात दाऊदच्या ‘डी-कंपनी’बाबत चुकीचा उल्लेख; भारताने UN ला सुनावले खडेबोल
फरार गुंड आणि आंतरराष्ट्रीय दहशतवादी दाऊद इब्राहिमच्या ‘डी-कंपनी’ला भारतात स्थित असा उल्लेख करणाऱ्या संयुक्त राष्ट्रांच्या (UN) एका विशेष प्रतिनिधीच्या अहवालावर भारताने अत्यंत तीव्र शब्दांत आक्षेप नोंदवला आहे. संयुक्त राष्ट्रांच्या दहशतवादविरोधी विषयावरील अहवालात आढळलेल्या या गंभीर आणि अक्षम्य तथ्यात्मक चुकीवर भारताने उघडपणे टीका केली आहे. अशा प्रकारच्या बिनबुडाच्या चुका आणि संयुक्त राष्ट्रांच्या तज्ज्ञांमधील उत्तरदायित्वाचा अभाव जागतिक संस्थेच्या विश्वासार्हतेला आणि पारदर्शकतेला तडा देणारा आहे, असा गंभीर इशाराही भारताकडून देण्यात आला आहे.
UN च्या बैठकीत भारताची कडक भूमिका
संयुक्त राष्ट्रसंघातील भारताच्या स्थायी मिशनचे प्रथम सचिव राघू पुरी यांनी संयुक्त राष्ट्रांच्या आमसभेच्या ‘तिसऱ्या समिती’च्या बैठकीत हा कळीचा मुद्दा उपस्थित केला. ‘दहशतवादाचा सामना करताना मानवाधिकार आणि मूलभूत स्वातंत्र्यांचे रक्षण’ या विषयावर विशेष प्रतिनिधी बेन सॉल यांनी सादर केलेल्या अहवालातील गंभीर चुकांचा त्यांनी खरपूस समाचार घेतला. पुरी म्हणाले की, विशेष प्रतिनिधी तथ्यहीन अहवाल प्रसिद्ध करतात आणि त्याबाबत कोणतीही जबाबदारी स्वीकारत नाहीत, ही बाब अतिशय चिंतेची आहे. यामुळे सदस्य देशांना सार्वजनिक चर्चेपूर्वी आपली योग्य बाजू मांडण्याची संधीच मिळत नाही.
#IndiaAtUN Raghoo Puri, First Secretary, took part in the interactive Dialogue with Special Rapporteur on the promotion and protection of human rights and fundamental freedoms while countering terrorism in the Third Committee of the General Assembly. He highlighted: ➡️ Factual inaccuracies in reports of SRs are unacceptable. ➡️ Report mentions listing of the leader of the “D-Company” for association with Al-Qaida. Read in isolation, it paints a very different picture from what is actual reality. ➡️ Dawood Ibrahim, has been wanted in India for terror attacks since 1993. And this is clearly written in the narrative summary of the reasons of listing under the 1267 sanctions mechanism. He resides in the same country where Osama bin Laden was found and neutralized. ➡️ HR Frameworks cannot be the refuge of the perpetrators of terror and those who propagate radicalization and extremism. Terrorism can never be justified. ➡️ Pakistan’s statement is pure propaganda for narrow political gains of its actual rulers, its military. @PMOIndia @MEAIndia @IndianDiplomacy @PIB_India @airnewsalerts @DDNewslive @UN — India at UN, NY (@IndiaUNNewYork) October 22, 2026
दाऊद इब्राहिम 1993 पासून भारतात वॉन्टेड
अहवालातील चुकीच्या विधानाचा स्पष्ट शब्दांत समाचार घेताना पुरी म्हणाले की, संयुक्त राष्ट्रांच्या सुरक्षा परिषदेने 2003 मध्ये दाऊद इब्राहिमला ‘अल-कायदा निर्बंध यादीत’ समाविष्ट केले होते. मात्र, त्याला ‘भारतात स्थित’ म्हणणे हे वास्तवाचा विपर्यास करणारे आहे. 1993 च्या मुंबई साखळी बॉम्बस्फोटांनंतर दाऊद इब्राहिम भारतातून पळून गेला होता आणि तो भारतात ‘वॉन्टेड’ आहे. हीच वस्तुस्थिती संयुक्त राष्ट्रांच्या ‘1267 निर्बंध प्रणाली’मध्ये स्पष्टपणे नोंदवलेली आहे. भारत सोडून पळाल्यानंतरच अल-कायदा आणि ओसामा बिन लादेनशी असलेल्या संबंधांमुळे त्याचे नाव यादीत आले होते. पुढे अप्रत्यक्षपणे पाकिस्तानवर निशाणा साधत पुरी यांनी स्पष्ट केले की, दाऊद ज्या देशात आश्रय घेऊन आहे, त्याच देशात अल-कायदाचा म्होरक्या ओसामा बिन लादेन 2011 मध्ये अमेरिकेच्या ‘नेव्ही सील्स’ कारवाईत मारला गेला होता. अशा मोठ्या चुका जागतिक संस्थेच्या प्रतिष्ठेला बाधा पोहोचवतात, असे भारताने ठामपणे बजावले.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.