दिल्ली मेट्रो प्रवाशांसाठी महत्त्वाची बातमी! आजही 6 मेट्रो स्टेशन बंद; दुपारी 4 वाजेपर्यंत प्रवेशावर निर्बंध

नवी दिल्ली : राजधानी दिल्लीमध्ये काँग्रेसच्या मोर्चाच्या पार्श्वभूमीवर सुरक्षेच्या कारणास्तव दिल्ली मेट्रोच्या सहा स्थानकांवरील प्रवेश आणि बाहेर पडण्याचे दरवाजे बंद करण्यात आले आहेत. सोमवार, १२ ऑक्टोबर रोजी सकाळी ६ ते दुपारी ४ वाजेपर्यंत हे निर्बंध लागू करण्यात आले आहेत. त्यामुळे प्रवाशांनी प्रवासाचे नियोजन करूनच घराबाहेर पडण्याचे आवाहन करण्यात आले आहे.

कोणती सहा मेट्रो स्थानके बंद?

दिल्ली मेट्रो रेल कॉर्पोरेशनने (DMRC) दिलेल्या माहितीनुसार, राजीव चौक, केंद्रीय सचिवालय, पटेल चौक, जनपथ, मंडी हाऊस आणि बाराखंबा रोड या सहा स्थानकांवर प्रवेश आणि बाहेर पडण्याची सुविधा तात्पुरती बंद ठेवण्यात आली आहे. मात्र, या स्थानकांवरून दुसऱ्या मेट्रो मार्गावर जाण्यासाठी इंटरचेंजची सुविधा सुरू राहणार आहे. परिस्थितीचा आढावा घेतल्यानंतर आवश्यक त्या सूचना दिल्या जातील.

काँग्रेसच्या मोर्चाच्या पार्श्वभूमीवर सुरक्षा व्यवस्था

काँग्रेस आणि विरोधी पक्षांनी मुख्य निवडणूक आयुक्त ज्ञानेश कुमार यांच्या राजीनाम्याची मागणी तसेच मतदार यादीच्या विशेष सखोल पुनरावलोकन प्रक्रियेतील कथित अनियमिततांविरोधात सर्वोच्च न्यायालयाच्या दिशेने मोर्चा काढण्याचे नियोजन केले आहे. राहुल गांधी यांनी या मोर्चासाठी ‘चलो दिल्ली’चे आवाहन केले आहे.

वाहतुकीवरही परिणाम होण्याची शक्यता

दिल्ली वाहतूक पोलिसांनी नवी दिल्ली आणि मध्य दिल्लीतील अनेक रस्त्यांवर वाहतूक कोंडी तसेच मार्ग वळवण्याची शक्यता व्यक्त केली आहे. वाहनचालकांनी वाहतूक पोलिसांच्या सूचनांचे पालन करावे आणि प्रवासासाठी अतिरिक्त वेळ राखून ठेवावा, असे आवाहन करण्यात आले आहे. प्रवाशांनी मेट्रो आणि रस्ते वाहतुकीबाबतचे ताजे अपडेट तपासूनच प्रवास करणे योग्य ठरेल.