IndiGo Flight Crisis: नागरी विमान वाहतूक क्षेत्रातील ताज्या घडामोडींमध्ये, इंडिगो विमानांच्या संकटादरम्यान सरकारने तात्पुरते उपाययोजना जाहीर केल्या आहेत. शुक्रवारी नागरी विमान वाहतूक मंत्री के. राममोहन नायडू यांनी सांगितले की, फ्लाइट ड्युटी टाइम लिमिटेशन (FDTL) नियम तात्पुरते स्थगित केले जात आहेत आणि सामान्य कामकाज पूर्ववत करण्यासाठी इतर अनेक उपाययोजना राबवल्या जातील. तथापी, मंत्र्यांनी सांगितले की, इंडिगो विमानांच्या व्यत्ययाची कारणे आणि जबाबदारी निश्चित करण्यासाठी सरकारने उच्चस्तरीय चौकशीचे आदेश दिले आहेत. या चौकशीत इंडिगोमध्ये काय चूक झाली याची तपासणी केली जाईल, आवश्यकतेनुसार योग्य कारवाई निश्चित केली जाईल आणि भविष्यात अशा अडचणी टाळण्यासाठी उपाययोजना सुचवल्या जातील.
पुढील तीन दिवसांत सेवा पूर्णपणे चालू होणार
नागरी विमान वाहतूक मंत्र्यांच्या माहितीप्रमाणे, पुढील तीन दिवसांत इंडिगोची पूर्ण सेवा पुन्हा सुरळीत होण्याची अपेक्षा आहे. प्रवाशांची गैरसोय कमी करण्यासाठी आणि विमानांची कामगिरी स्थिर करण्यासाठी हा निर्णय महत्त्वाचा मानला जातो.
हेही वाचा - Air Ticket Prices Too High : इंडिगोच्या 1000 हून अधिक फ्लाइट रद्द; पण विमान कंपन्यांनी तिकीट दरात मोठी वाढ केलीय, प्रवाशांना 'दुहेरी दणका'
प्रवाशांसाठी तात्पुरती सोय
मंत्रालयाने जारी केलेल्या आदेशात म्हटले आहे की तात्पुरते अडकलेल्या प्रवाशांना एअरलाइन्सने बुक केलेल्या हॉटेलमध्ये राहण्याची व्यवस्था केली जाईल. ज्येष्ठ नागरिकांच्या सोयीसाठी, लाउंज अॅक्सेससह विशेष व्यवस्था करण्यात आली आहे. विलंबित उड्डाणे असलेल्या प्रवाशांना अल्पोपहार आणि इतर आवश्यक सुविधा पुरविल्या जातील. मंत्रालयाने 24x7 नियंत्रण कक्ष देखील स्थापन केला आहे, जो वेळोवेळी परिस्थितीवर लक्ष ठेवत आहे. प्रवाशांनी खालील क्रमांकावर संपर्क करण्याच्या सूचना देण्यात आल्या आहेत: 011-24610843, 011-24693963, 096503-91859
हेही वाचा - IndiGo Flight Cancel: पायलट ड्यूटीत DGCA दिली थोडी सूट; इंडिगोचा गोंधळ नियंत्रणात आणण्याचा प्रयत्न
इंडिगोची माफी आणि सरकारची पुढील कार्यवाही
दरम्यान, इंडिगोने प्रवाशांकडून झालेल्या गैरसोयीबद्दल माफी मागितली आहे. नागरी विमान वाहतूक मंत्रालयाने सांगितले की केंद्र सरकार सर्व भागधारकांशी सतत संपर्कात आहे आणि DGCA च्या मार्गदर्शनाखाली उड्डाण वेळापत्रक अपडेट करून सेवांची स्थिरता सुनिश्चित केली जाईल. याआधी DGCA ने इंडिगो एअरलाइन्सला तात्पुरती सूट दिली होती, ज्यामुळे उड्डाण ऑपरेशन्स स्थिर ठेवता येतील आणि प्रवाशांची गैरसोय कमी होईल.