दिल्लीत मुख्य निवडणूक आयुक्त ज्ञानेश कुमार यांच्या राजीनाम्याची मागणी करण्यासाठी आणि निवडणूक आयोगाच्या ‘विशेष सखोल पुनरावलोकन’ (SIR) प्रक्रियेच्या विरोधात आयोजित निदर्शनादरम्यान राजकीय वातावरणात मोठा हायव्होल्टेज ड्रामा पाहायला मिळाला. जंतर-मंतरच्या दिशेने कूच करताना दिल्ली पोलिसांनी पश्चिम बंगालच्या मुख्यमंत्री ममता बॅनर्जी आणि आम आदमी पार्टीचे (आप) राष्ट्रीय संयोजक अरविंद केजरीवाल यांना ताब्यात घेतले होते. मात्र, काही तासांच्या चौकशी व प्रशासकीय प्रक्रियेनंतर पोलिसांनी या दोन्ही प्रमुख नेत्यांची सन्मानाने सुटका केली आहे. या धडक कारवाईमुळे राजधानी दिल्लीतील राजकीय वातावरण चांगलंच तापले होते.
विरोधकांचे इतर प्रमुख नेतेही पोलिसांच्या ताब्यात
ममता बॅनर्जी आणि अरविंद केजरीवाल यांच्यासोबत विरोधी पक्षांच्या अनेक ज्येष्ठ खासदारांना आणि वरिष्ठ नेत्यांनाही पोलिसांनी ताब्यात घेतले होते. यामध्ये तृणमूल काँग्रेसचे (TMC) खासदार डेरेक ओ’ब्रायन, ‘आप’चे खासदार संजय सिंह, दिल्लीचे माजी मंत्री सौरभ भारद्वाज आणि सीपीआय (एम) च्या ज्येष्ठ नेत्या वृंदा करात यांचा समावेश होता. या सर्व नेत्यांना जंतर-मंतर परिसरातून ताब्यात घेऊन पोलीस ठाण्यात नेण्यात आले होते. त्यानंतर सर्व कायदेशीर प्रक्रिया पूर्ण करून इतर सर्व नेत्यांचीही पोलिसांकडून सुटका करण्यात आली आहे.
हेही वाचा –SIR प्रक्रियेवरून 124 माजी IAS-IFS अधिकाऱ्यांचे नागरिकांना खुले पत्र; विरोधकांना विचारला ‘हा’ सवाल
‘एसआयआर’ प्रक्रिया आणि कथित अनियमिततेचा आरोप
निवडणूक आयोगाद्वारे राबवल्या जाणाऱ्या ‘विशेष सखोल पुनरावलोकन’ (SIR) प्रक्रियेत आणि मतदार याद्यांमध्ये मोठ्या प्रमाणावर गैरप्रकार व फेरफार होत असल्याचा गंभीर आरोप विरोधी पक्षांकडून करण्यात येत आहे. या प्रक्रियेला तात्काळ स्थगिती देण्यात यावी आणि मुख्य निवडणूक आयुक्त ज्ञानेश कुमार यांनी आपल्या पदाचा राजीनामा द्यावा, या मागणीसाठी विरोधी आघाडीच्या सर्व घटक पक्षांनी एकत्र येत जंतर-मंतर येथे भव्य आंदोलनाची हाक दिली होती. मात्र, सुरक्षेचे कारण देत पोलिसांनी या आंदोलनाला परवानगी नाकारली होती.
परवानगी नसतानाही आंदोलनावर ठाम; दिल्लीत तणाव
दिल्ली पोलिसांकडून परवानगी नाकारण्यात आलेली असतानाही ‘इंडिया’ (INDIA) आघाडीचे नेते आणि कार्यकर्ते आंदोलनावर ठाम राहिले. नेत्यांनी जंतर-मंतरकडे जाण्याचा प्रयत्न करताच पोलिसांनी त्यांना रस्त्यातच अडवून ताब्यात घेण्यास सुरुवात केली. पोलिसांच्या या कारवाईमुळे कार्यकर्त्यांनी केंद्र सरकार आणि निवडणूक आयोगाविरोधात जोरदार घोषणाबाजी केली. नेत्यांच्या सुटकेनंतर आता विरोधी पक्ष या मुद्द्यावरून न्यायालयीन आणि राजकीय लढाई अधिक तीव्र करण्याची शक्यता वर्तवण्यात येत आहे.
