मणिपूरमध्ये अतिरेक्यांच्या गोळीबारात 3 नागरिकांचा मृत्यू; मुख्यमंत्र्यांच्या निवासस्थानाबाहेर मृतदेह ठेवत…

Manipur Firing: मणिपूरमध्ये हिंसाचाराचे सत्र पुन्हा सुरू झाले असून जंगलात लाकूड गोळा करण्यासाठी गेलेल्या नागरिकांवर अतिरेक्यांनी अंदाधुंद गोळीबार केला. या दुर्दैवी घटनेत 3 जणांचा मृत्यू झाला असून अन्य 3 जण गंभीर जखमी झाले आहेत. या घटनेमुळे संतप्त झालेल्या नागरिकांनी दोन मृतदेह थेट राज्याचे मुख्यमंत्री वाय. खेमचंद सिंह यांच्या निवासस्थानाबाहेर ठेवून निदर्शने केली, ज्यामुळे संपूर्ण परिसरात प्रचंड तणावाचे वातावरण निर्माण झाले.

सीमावर्ती भागात अंधाधुंद गोळीबार
इम्फाळ पूर्व आणि कांगपोकपी जिल्ह्यांच्या सीमावर्ती भागातील जंगलात मेईतेई समुदायातील 16 नागरिक लाकूड गोळा करण्यासाठी गेले असताना हा प्राणघातक हल्ला झाला. यामध्ये अरुबाम रोनिल (35) आणि लैरेनलकपम इनाओबी (51) यांचा गोळीबारात घटनास्थळीच मृत्यू झाला. क्षत्रिमायुम सुशील (32) या गंभीर जखमी झालेल्या नागरिकाचा रुग्णालयात उपचारादरम्यान मृत्यू झाला. एन. सुरज (19), मेइसनाम सोमेंद्रो (53) आणि के. बोसान (45) या 3 जखमींवर सध्या रुग्णालयात उपचार सुरू आहेत, तर अन्य 3 नागरिक अजूनही बेपत्ता आहेत.

मुख्यमंत्र्यांच्या निवासस्थानाबाहेर अश्रुधुराचा वापर
मे 2023 पासून राज्यात सुरू असलेल्या सततच्या हिंसाचाराचा निषेध करण्यासाठी संतप्त जमाव मृतदेह घेऊन इम्फाळ शहरात दाखल झाला. त्यांनी बाबूपारा परिसरातील मुख्यमंत्री निवासस्थानाच्या मुख्य प्रवेशद्वाराबाहेर दोन मृतदेह ठेवून सरकारविरोधात जोरदार घोषणाबाजी केली. या आंदोलनकर्त्यांना पांगवण्यासाठी पोलिसांनी अखेर अश्रुधुराच्या नळकांड्या फोडल्या, त्यानंतर मृतदेह उपचारासाठी जवाहरलाल नेहरू वैद्यकीय विज्ञान संस्थेत (JNIMS) हलवण्यात आले. निदर्शनांनंतर मुख्यमंत्र्यांनी खाजगी रुग्णालयात जाऊन जखमींची विचारपूस केली, मात्र त्यांनी प्रसारमाध्यमांशी बोलणे टाळले.

हेही वाचा – कॉकरोच जनता पार्टीच्या नेत्यांना धक्का! सौरव दास आणि आशुतोष रांका यांच्या कोठडीत 2 दिवसांची वाढ

बंद आणि आंदोलनामुळे जनजीवन विसकळीत
या घटनेच्या तीव्र पडसाद संपूर्ण इम्फाळमध्ये उमटलेले पाहायला मिळाले. संतप्त आंदोलकांनी खुराई लामलोंग येथे रस्ता रोखून धरला, तर इम्फाळमधील ऐतिहासिक एमा कैथेल बाजारात महिलांच्या एका मोठ्या गटाने रस्त्यावर उतरून निदर्शने केली. या घटनेनंतर संपूर्ण इम्फाळमधील प्रमुख बाजारपेठा आणि दुकाने बंद ठेवण्यात आली होती.

बेपत्ता नागरिकांचा शोध सुरू
स्थानिक प्रशासनाकडून सध्या बेपत्ता असलेल्या 3 नागरिकांचा शोध घेतला जात असून हिंसाचारग्रस्त भागात अतिरिक्त सुरक्षा दल तैनात करण्यात आले आहे. वाढत्या तणावाच्या पार्श्वभूमीवर नागरिकांना शांतता राखण्याचे आवाहन प्रशासनाकडून करण्यात येत आहे.

हेही वाचा – ‘राहुल गांधी पुन्हा सुट्टीवर…’; परदेश दौऱ्यावर गेल्यावरून भाजपचा राहुल गांधींवर जोरदार निशाणा, शेअर केलं व्यंगात्मक पोस्टर