NPPA Cancer Drug Price Reduction 2026: कर्करोगासारख्या आजाराशी लढा देणाऱ्या रुग्णांना आणि त्यांच्या कुटुंबांना केंद्र सरकारने एक अत्यंत दिलासादायक बातमी दिली आहे. औषधांच्या किमतींवर नियंत्रण ठेवणारी संस्था नॅशनल फार्मास्युटिकल प्राइसिंग अथॉरिटी (NPPA) ने शनिवार रोजी तब्बल 137 नॉन-शेड्यूल्ड अँटी-कॅन्सर औषधांच्या ट्रेड मार्जिनवर म्हणजेच नफ्यावर 30 टक्क्यांची मर्यादा (Cap) घातली आहे. केंद्रीय रसायन आणि खत मंत्रालयाने जारी केलेल्या निवेदनानुसार, हा नवा नियम 9 नोव्हेंबरपासून देशभरात लागू होणार आहे. यामुळे सध्याच्या किमतींच्या तुलनेत कॅन्सरच्या औषध दरांमध्ये तब्बल 70 टक्क्यांपर्यंत मोठी घसरण होण्याची शक्यता निर्माण झाली आहे.
DGHS च्या तज्ज्ञ समितीच्या शिफारशींवर निर्णय
आरोग्य सेवा महासंचालनालयाच्या (DGHS) अंतर्गत स्थापन करण्यात आलेल्या तज्ज्ञ समितीच्या शिफारशींवर आधारित हा महत्त्वपूर्ण निर्णय घेण्यात आला आहे. देशभरातील नामांकित कर्करोग तज्ज्ञ, वैद्यकीय अधिकारी आणि रुग्णालयांच्या प्रतिनिधींचा समावेश असलेल्या या समितीने ट्रेड मार्जिनचे सुसूत्रीकरण करण्यासाठी 137 औषधांची नावे सुचवली होती. यापूर्वी 2019 मध्ये NPPA ने प्रायोगिक तत्त्वावर कर्करोगावरील 42 औषधांच्या नफ्यावर 30 टक्क्यांची मर्यादा आणली होती, ज्यामुळे 526 ब्रँड्सच्या औषध किमतींमध्ये 90 टक्क्यांपर्यंत घट झाली होती. आता त्याच यशस्वी उपक्रमाचा विस्तार करत अधिक प्रमाणात औषधांचा यामध्ये समावेश करण्यात आला आहे.
9 नोव्हेंबरपासून सुधारित दरानेच विक्री अनिवार्य
ड्रग्ज (प्राइसेस कंट्रोल) ऑर्डर, 2013 च्या पॅराग्राफ 19 अंतर्गत ट्रेड मार्जिन रॅशनलायझेशन (TMR) व्यवस्था लागू करण्यात आली आहे. या नव्या धोरणानुसार, सर्व औषध उत्पादक कंपन्यांना आपल्या सुधारित दरांची यादी अधिकृत संकेतस्थळावर (Website) प्रसिद्ध करणे आणि ती किरकोळ विक्रेते व रुग्णालयांपर्यंत पोहोचवणे बंधनकारक करण्यात आले आहे. 9 नोव्हेंबरपासून रुग्णालये आणि औषध विक्रेत्यांना केवळ सुधारित आणि कमी केलेल्या दरांमध्येच औषधांची विक्री करावी लागणार असून नव्या किमती आपल्या दुकानात स्पष्टपणे प्रदर्शित कराव्या लागतील.
रुग्णालयांवर थेट जबाबदारी
कर्करोगाच्या उपचारासाठी लागणारी औषधे मोठ्या प्रमाणावर थेट खरेदी करणाऱ्या सर्व रुग्णालयांना आपापल्या वेबसाईटवर नवीन दर ठळकपणे दाखवावे लागतील. या सुधारित दरांची प्रत्यक्ष अंमलबजावणी सुरळीत होत आहे की नाही, याची थेट जबाबदारी रुग्णालयांवर सोपवण्यात आली आहे. याशिवाय, किमती कमी झाल्यामुळे देशात कर्करोगाच्या औषधांचा कोणताही तुटवडा निर्माण होऊ नये, यासाठी सर्व औषध कंपन्यांनी आपल्या सध्याच्या उत्पादनाचा आणि पुरवठ्याचा स्तर पूर्वीप्रमाणेच कायम ठेवावा, असे कडक निर्देशही सरकारने दिले आहेत.
नियमांच्या कडक पालनासाठी राज्य ड्रग कंट्रोलर तत्पर
या नव्या नियमांचे काटेकोर पालन सर्व उत्पादक, विक्रेते आणि रुग्णालयांकडून केले जात आहे की नाही, हे पाहण्याची जबाबदारी राज्य शासनांच्या ड्रग कंट्रोलर्सकडे सोपवण्यात आली आहे. सर्वसामान्य नागरिक आणि रुग्ण NPPA चे अधिकृत संकेतस्थळ तसेच ‘फार्मा सही दाम’ (Pharma Sahi Daam) या मोबाईल अ‍ॅपचा वापर करून सुधारित दरांची माहिती सहज मिळवू शकतात. सरकारच्या या निर्णयामुळे कॅन्सरच्या उपचारावरील अवाढव्य वैद्यकीय खर्च मोठ्या प्रमाणावर कमी होण्यास मदत होणार आहे.
हेही वाचा – सरकारी कर्मचाऱ्यांसाठी आनंदाची बातमी! यंदा ‘या’ राज्यातील सरकारने महागाई भत्त्यात केली घसघशीत वाढ
