PM Modi : पश्चिम आशियातील वाढत्या संघर्षाचा परिणाम भारताच्या एलपीजी (LPG) पुरवठ्यावर झाला असून निर्माण झालेल्या टंचाईवर पंतप्रधान नरेंद्र मोदी यांनी देशवासियांना मोठा दिलासा दिला आहे. गुरुवारी NXT समिटला संबोधित करताना पंतप्रधानांनी स्पष्ट केले की, ज्याप्रमाणे भारताने कोविड-19 (COVID-19) महामारीवर मात केली, त्याच धैर्याने आपण या इंधन संकटातूनही लवकरच बाहेर पडू. जागतिक संघर्षाचा भार सामान्य भारतीय नागरिकांवर पडू नये, यासाठी सरकार विविध स्तरांवर प्रयत्नशील असल्याचे त्यांनी नमूद केले.
पुरवठा साखळीतील अडथळे दूर करण्यासाठी प्रयत्न
पंतप्रधानांनी सांगितले की, पश्चिम आशियातील युद्धामुळे जागतिक ऊर्जा संकट निर्माण झाले आहे. मात्र, भारत आपली ऊर्जा सुरक्षा सुनिश्चित करण्यासाठी अनेक देशांच्या नेत्यांशी सतत संपर्कात आहे. पुरवठा साखळीत (Supply Chain) येणारे अडथळे दूर करण्यासाठी सरकार युद्धपातळीवर काम करत आहे. पंतप्रधान म्हणाले की, "मला 140 कोटी भारतीयांवर पूर्ण विश्वास आहे. जगाच्या कोणत्याही कोपऱ्यात युद्ध सुरू असले, तरी त्याचा त्रास आपल्या नागरिकांना होऊ नये, हाच आमचा संकल्प आहे."
एथेनॉल मिश्रण आणि पेट्रोलियम साठ्यामध्ये वाढ
इंधनासाठी परदेशांवरील अवलंबित्व कमी करण्यासाठी गेल्या दशकात केलेल्या प्रयत्नांची माहिती पंतप्रधानांनी दिली. 2014 पूर्वी पेट्रोलमध्ये एथेनॉल मिश्रणाचे प्रमाण केवळ 1-1.5 टक्के होते, जे आता 20 टक्क्यांपर्यंत पोहोचले आहे. भारताने आपला धोरणात्मक पेट्रोलियम साठा (Strategic Petroleum Reserve) आता 50 लाख टनांपेक्षा अधिक केला आहे. याशिवाय, देशातील एलपीजी कनेक्शनची संख्या 2014 मधील 14 कोटींवरून वाढून आता 33 कोटींवर पोहोचली आहे, ज्यामुळे वितरण व्यवस्था अधिक बळकट झाली आहे.
हेही वाचा – LPG Shortage: सिलिंडरची साठेबाजी भोवली! घरात लपवून ठेवले होते 32 गॅस सिलिंडर; पोलिसांची मोठी कारवाई
काळाबाजार आणि साठेबाजी करणाऱ्यांवर कठोर कारवाई
एलपीजीच्या उपलब्धतेबाबत भीती पसरवून काळाबाजार करणाऱ्यांना पंतप्रधानांनी कडक इशारा दिला आहे. गॅस सिलिंडरची साठेबाजी करणाऱ्यांविरुद्ध केंद्र सरकार कठोर पावले उचलणार आहे. त्यांनी सर्व राज्य सरकारांना आवाहन केले की, त्यांनी आपापल्या भागात पाळत ठेवणारी यंत्रणा अधिक मजबूत करावी, जेणेकरून बेईमान तत्व या परिस्थितीचा फायदा घेऊ शकणार नाहीत. जनतेने कोणत्याही अफवांवर विश्वास ठेवू नये, असे आवाहनही त्यांनी यावेळी केले.
स्थिर भारताची जागतिक प्रगती
पंतप्रधान मोदींच्या मते, जग सध्या कठीण काळातून जात असले तरी भारत आपली प्रगती स्थिर गतीने सुरू ठेवत आहे. गॅस पाईपलाईन नेटवर्क, एलएनजी (LNG) टर्मिनल्स आणि वितरण व्यवस्थेचा विस्तार झाल्यामुळे भारत या जागतिक आव्हानांना तोंड देण्यासाठी सज्ज आहे. जागतिक विकासात भारत आजही प्रमुख भूमिका बजावत असून, ऊर्जा संकट निवारणासाठी बायोफ्युएल आणि पर्यायी इंधनावर दिलेला भर भविष्यात अधिक फलदायी ठरेल, असा विश्वास त्यांनी व्यक्त केला.
