Barmer-Jodhpur Highway Accident : राजस्थानमधील बाडमेर-जोधपूर महामार्गावर गुरुवारी सायंकाळी भीषण अपघात झाला. एका खासगी स्लीपर बस आणि ट्रेलरची समोरासमोर झालेल्या धडकेत 6 प्रवाशांचा जागीच मृत्यू झाला आहे, तर अनेक प्रवासी गंभीर जखमी झाले आहेत. अपघाताची भीषणता इतकी जास्त होती की बसचा उजवा भाग पूर्णपणे चक्काचूर झाला आहे.
अपघाताची भयावहता आणि बचावकार्य
बाडमेर जिल्ह्याजवळ झालेल्या या दुर्घटनेनंतर परिसरात एकच खळबळ उडाली आणि मदतीसाठी प्रवाशांची धावपळ सुरू झाली. घटनेची माहिती मिळताच स्थानिक पोलीस आणि आपत्कालीन पथके तात्काळ घटनास्थळी दाखल झाली. पोलीस आणि स्थानिक नागरिकांनी तातडीने मदतकार्य राबवून बसमध्ये अडकलेल्या प्रवाशांना बाहेर काढले. सर्व जखमींना बालोतरा येथील नाहटा रुग्णालयात उपचारासाठी हलवण्यात आले आहे. डॉक्टरांच्या मते, काहींची प्रकृती अत्यंत गंभीर असल्याने मृतांचा आकडा वाढण्याची भीती व्यक्त केली जात आहे.
हेही वाचा - Haldiram: 89 वर्षांच्या विश्वासाला तडा! हल्दीरामच्या गोदामात 112 किलो एक्सपायर्ड माल, तर 55 लाखांचा भेसळयुक्त साठा...
पोलीस तपास आणि प्राथमिक अंदाज
अपघाताचे नेमके कारण शोधण्यासाठी पोलिसांनी तपास सुरू केला आहे. प्राथमिक तपासावरून हा समोरासमोरचा भीषण अपघात असल्याचे दिसते. भरधाव वेग, चालकाचा थकवा किंवा कमी दृश्यमानता (Low Visibility) यापैकी कशामुळे हा अपघात झाला, याचा पोलीस कसून तपास करत आहेत. अपघातग्रस्त बसच्या समोरच्या उजव्या बाजूचा चकणाचूर झाला आहे. यावरून धडकेची तीव्रता किती जास्त होती, याचा अंदाज येतो.
महामार्गावरील वाढत्या अपघातांवर चिंता
राजस्थानमध्ये गेल्या काही आठवड्यांतील हा दुसरा मोठा रस्ते अपघात आहे. गेल्या महिन्यातच जोधपूर-जैसलमेर महामार्गावर रामदेवरा येथून परतणाऱ्या भाविकांच्या बसचा ट्रेलरशी अपघात झाला होता, ज्यात 4 जणांना जीव गमवावा लागला होता. महामार्गांवर होणाऱ्या या सततच्या अपघातांमुळे प्रशासनावर प्रश्नचिन्ह निर्माण झाले आहे. या पार्श्वभूमीवर, प्रशासनाने वाहनचालकांना विशेषतः रात्रीच्या वेळी राष्ट्रीय महामार्गांवर वाहन चालवताना काळजी घेण्याची आणि वेग मर्यादेचे पालन करण्याची कडक सूचना दिली आहे.
हेही वाचा - Uber Air Taxi: आता ट्रॅफिकचे टेन्शन विसरा! रस्त्यावर नाही, थेट आकाशात धावणार तुमची 'उबर टॅक्सी'; कुठे सुरू झाली सेवा? वाचा