दुर्दैवी! दोन ट्रकची समोरासमोर भीषण धडक; अपघातानंतर आग लागल्याने दोन्ही चालकांचा होरपळून मृत्यू

ओडिशा राज्यातील सुंदरगड जिल्ह्यात रविवारी अत्यंत थरारक आणि हृदयद्रावक अपघाताची घटना समोर आली आहे. लेफ्रिपडा पोलीस ठाण्याच्या हद्दीत असणाऱ्या अमलाबहल गावाजवळ, कोळशाच्या वाहतुकीसाठी वापरल्या जाणाऱ्या मार्गावर दोन ट्रेलर ट्रकची समोरासमोर जोरदार धडक झाली. ही धडक इतकी भीषण होती की, अपघातानंतर अवघ्या काही सेकंदांतच दोन्ही वाहनांना भीषण आग लागली. आगीच्या रौद्र ज्वाळांनी वाहनांचे कॅबिन पूर्णपणे वेढले, ज्यामुळे आत अडकलेल्या दोन्ही चालकांचा होरपळून जागीच दुर्दैवी मृत्यू झाला. बिहार आणि झारखंड येथील रहिवासी असलेल्या 35 आणि 37 वर्षीय चालकांचा यात अंत झाला आहे.

खाणीतून कोळसा नेताना घडला अपघात

मिळालेल्या माहितीनुसार, ‘माहानदी कोलफील्ड्स लिमिटेड’ (MCL) च्या खाणीतून कोळसा भरून जाणारा एक ट्रेलर ट्रक समोरून येणाऱ्या दुसऱ्या रिकाम्या ट्रेलरला जोरदार धडकला. अपघाताचा जोरदार आवाज होताच परिसरात घबराट पसरली. धडकेमुळे निर्माण झालेल्या ठिणग्या आणि इंधनामुळे वाहनांनी क्षणात पेट घेतला. आगीची तीव्रता इतकी प्रचंड होती की, घटनास्थळी उपस्थित असलेले इतर ट्रकचालक आणि प्रत्यक्षदर्शी मदत करण्यासाठी पुढे सरसावले, परंतु आगीच्या ज्वाळांमुळे ते चालकांपर्यंत पोहोचू शकले नाहीत. दोन्ही चालकांना कॅबिनमधून बाहेर पडण्याची कोणतीही संधी मिळाली नाही.

हेही वाचा – राजधानी हादरली! राष्ट्रपती भवनाजवळ आगीची घटना; अग्निशमन दलाच्या 6 गाड्या घटनास्थळी दाखल

अग्निशमन दलाकडून आगीवर नियंत्रण

घटनेची माहिती मिळताच स्थानिक रहिवाशांनी तातडीने पोलीस आणि अग्निशमन दलाला पाचारण केले. अग्निशमन दलाच्या पथकाने घटनास्थळी पोहोचून कठोर परिश्रमानंतर आगीवर पूर्णपणे नियंत्रण मिळवले. मात्र, तोपर्यंत दोन्ही चालकांचे शरीर पूर्णपणे जळून खाक झाले होते. आग पूर्ण विझल्यानंतर पोलिसांनी दोन्ही गाड्यांच्या अवशेषांमधून मृतदेह बाहेर काढून शवविच्छेदनासाठी रुग्णालयात पाठवले आहेत. लेफ्रिपडा पोलिसांनी दोन्ही दुर्घटनाग्रस्त ट्रेलर जप्त केले असून, अपघात नेमका कशामुळे घडला आणि आगीचा भडका कसा उडाला, याचा सखोल तपास सुरू केला आहे.