नवी दिल्ली: पंतप्रधान नरेंद्र मोदी यांनी रविवारी त्यांच्या मासिक रेडिओ कार्यक्रम 'मन की बात'च्या 123 व्या भागात अनेक मुद्द्यांवर चर्चा केली. या दरम्यान त्यांनी देशाला दोन आनंदाच्या बातम्याही दिल्या. पहिली म्हणजे, भारत आता धोकादायक डोळ्यांच्या आजारापासून पूर्णपणे मुक्त झाला आहे. दुसरी बातमी म्हणजे, आता देशातील 64% पेक्षा जास्त लोकसंख्येला कोणत्या ना कोणत्या स्वरूपात सामाजिक सुरक्षेचा लाभ मिळत आहे.
भारताची ट्रेकोमापासून मुक्तता -
मन की बात कार्यक्रमात बोलताना पंतप्रधान म्हणाले की, ट्रॅकोमा नावाचा हा आजार एकेकाळी सामान्य झाला होता, जो बॅक्टेरियाद्वारे पसरतो. यावर वेळेवर उपचार केले नाहीत तर तो दृष्टी देखील हिरावून घेऊ शकतो. भारताने तो मुळापासून नष्ट करण्याचा निर्णय घेतला आणि आता WHO ने भारताला ट्रॅकोमा मुक्त घोषित केले आहे. मोदींनी या यशाचे श्रेय डॉक्टर, आरोग्य कर्मचारी आणि 'स्वच्छ भारत अभियान' आणि 'जल जीवन मिशन' सारख्या मोहिमांना दिले.
स्वच्छ भारत अभियान आणि जल जीवन मिशन सारख्या प्रयत्नांनी ट्रॅकोमासारख्या आजारांच्या मुळावर प्रहार केला आहे. जेव्हा प्रत्येक घरात स्वच्छ पाणी पोहोचले तेव्हा संसर्गाशी संबंधित आजारांचा धोका आपोआप कमी झाला. WHO ने देखील भारताच्या या धोरणाचे कौतुक केले आहे, असे पंतप्रधानांनी यावेळी सांगितले.
हेही वाचा - भगवान जगन्नाथाच्या रथयात्रेत चेंगराचेंगरी! 3 जणांचा जागीच मृत्यू, 50 जण जखमी
सामाजिक सुरक्षा
दरम्यान, आंतरराष्ट्रीय कामगार संघटनेच्या (ILO) अहवालाचा संदर्भ देत मोदी म्हणाले की, आता भारतातील 64% पेक्षा जास्त लोकसंख्येला कोणत्या ना कोणत्या सामाजिक सुरक्षा योजनेचा लाभ मिळत आहे. आज सुमारे 95 कोटी लोक प्रधानमंत्री जीवन ज्योती विमा योजना, प्रधानमंत्री सुरक्षा विमा योजना, अटल पेन्शन योजना यासारख्या योजनांचा लाभ घेत आहेत. मोदींनी याला जगातील सर्वात मोठ्या सामाजिक सुरक्षा कव्हरपैकी एक म्हटले आहे.
हेही वाचा - पंतप्रधान मोदींनी अंतराळात गेलेल्या शुभांशू शुक्ला यांच्याशी साधला संवाद; भारतीय अंतराळविराला दिला 'हा' गृहपाठ
मन की बातमध्ये 'महिला शक्ती'चा उल्लेख -
मन की बात कार्यक्रमात बोलताना पंतप्रधान मोदींनी सांगितले की, भारतातील महिला आता केवळ स्वतःसाठीच नाही तर संपूर्ण समाजासाठी एक नवीन दिशा ठरवत आहेत. 'महिला नेतृत्व हा विकासाचा मंत्र आहे' आणि देशाचे भविष्य आता महिलांच्या हातात अधिक मजबूत होत आहे. यावेळी पंतप्रधानांनी तेलंगणातील महिलांचे उदाहरण दिले. ज्या महिला पूर्वी शेतात मजूर म्हणून काम करत होत्या त्या आता बाजरीचे बिस्किट बनवत आहेत. त्यांनी बनवलेले हे बिस्किट आता लंडनमध्ये पोहोचले आहे.