Share Market Crash: भारतीय शेअर बाजारात सलग 6 दिवसांपासून सुरू असलेले घसरणीचे सत्र थांबण्याचे नाव घेत नाहीये. गेल्या आठवड्यातील मोठ्या घसरणीनंतर, सोमवारी देखील बाजाराची सुरुवात नकारात्मक झाली. गेल्या 6 व्यवहार सत्रांमध्ये गुंतवणूकदारांना तब्बल 17 लाख कोटी रुपयांचा फटका बसला असून, यामुळे बाजारपेठेत चिंतेचे वातावरण आहे. सोमवारी सकाळच्या सत्रात बीएसई सेन्सेक्स 500 पेक्षा जास्त अंकांनी घसरून 83,043 च्या नीचांकावर पोहोचला, तर निफ्टीने 25,550 ची पातळी ओलांडून खाली झेप घेतली. 2 जानेवारी रोजी गाठलेल्या विक्रमी उच्चांकापासून सेन्सेक्स आतापर्यंत 2,718 अंकांनी खाली आला आहे. बाजारातील या पडझडीमागे प्रामुख्याने 5 मोठी कारणे असल्याचे विश्लेषकांचे म्हणणे आहे:
भारत-अमेरिका व्यापार करार आणि टॅरिफ:
अमेरिकेच्या टॅरिफ धोरणाबाबत निर्माण झालेली अनिश्चितता आणि भारत-अमेरिका व्यापार करारातील विलंब यामुळे गुंतवणूकदारांमध्ये अस्वस्थता आहे. ट्रम्प प्रशासनाकडून येणारी विधाने या प्रक्रियेत गुंतागुंत निर्माण करत असल्याने बाजारात नफा वसुली (Profit Booking) दिसून येत आहे.
हेही वाचा – EPFO: कर्मचाऱ्यांसाठी आनंदाची बातमी; विसरलेला जुना PF नंबर आता झटक्यात मिळणार, पैसे काढणं होणार सोपं
परदेशी गुंतवणूकदारांची (FII) सततची विक्री:
परदेशी संस्थात्मक गुंतवणूकदारांनी भारतीय बाजारातून आपला पैसा काढून घेण्याचा सपाटा लावला आहे. गेल्या शुक्रवारीच 3,769 कोटी रुपयांच्या शेअर्सची विक्री झाली असून, सलग 6 सत्रांपासून ही विक्री सुरूच आहे.
कमकुवत जागतिक संकेत:
अमेरिकन फेडरल रिझर्व्हच्या स्वातंत्र्याबाबत निर्माण झालेले प्रश्नचिन्ह आणि अध्यक्ष जेरोम पॉवेल यांना मिळालेल्या धमक्यांमुळे जागतिक बाजारपेठा हादरल्या आहेत. याचा थेट परिणाम भारतीय इक्विटी मार्केटवर झाला आहे.
कच्च्या तेलाच्या वाढत्या किमती:
व्हेनेझुएलातील राजकीय उलथापालथ आणि इराणमधील निदर्शनांमुळे जागतिक स्तरावर कच्च्या तेलाच्या किमतीत वाढ होण्याची शक्यता निर्माण झाली आहे. भारत हा कच्च्या तेलाचा मोठा आयातदार असल्याने या भू-राजकीय तणावाचा बाजारावर मोठा दबाव आहे.
तांत्रिक निर्देशक (Technical Indicators):
तांत्रिकदृष्ट्या देखील बाजार सध्या कमकुवत स्थितीत आहे. निफ्टी आणि सेन्सेक्सने आपल्या महत्त्वाच्या 'सपोर्ट लेव्हल्स' तोडल्या असून, बाजार 20-दिवसांच्या 'सिंपल मूव्हिंग अॅव्हरेज' (SMA) च्या खाली व्यापार करत आहे. तज्ज्ञांच्या मते, जोपर्यंत निर्देशांक ठराविक पातळीवर स्थिर होत नाहीत, तोपर्यंत घसरणीचा हा धोका कायम राहू शकतो.
