सोशल मिडियावर कधी काय व्हायरल होईल हे सांगता येत नाही. रोज काही ना काही कंटेंट समोर येताना दिसतो. पण विचार करा तुमच्या एखाद्या रिलवर थेट भारताच्या पंतप्रधानांनीच प्रतिक्रिया दिली तर? हो. असंच काहीसं घडलंय एका सोशल मिडिया इन्फ्लुएंसरसोबत. पंतप्रधान नरेंद्र मोदी यांनी चक्क त्याचं रिल इन्स्टाग्रामला शेअर करत त्याच्यासाठी खास संदेशदेखील लिहिला आहे.
सोशल मिडियावर पंतप्रधानांच्या खासगी इन्स्टाग्राम अकाउंटवर एक स्टेटस बघायला मिळत आहे. यामध्ये सोशल मिडिया इन्फ्लुएंसर युवराज दुआ मोदींना एक विनंती करताना दिसत आहे. तसेच तिचे वडील पंतप्रधानांचे मोठे चाहते आहेत. त्यानंतर तिने पंतप्रधान मोदींना 'मन की बात' कार्यक्रमात साखरेचे सेवन कमी करण्याचा उल्लेख करण्याचे आवाहन केले, जेणेकरून तिच्या वडिलांनी त्यांच्या सूचनेनुसार साखरेचे सेवन कमी करावे. पंतप्रधान मोदींनी या व्हिडिओवर हलक्याफुलक्या पद्धतीने प्रतिक्रिया देत, निरोगी जीवनशैलीसाठी सल्ला दिला. व्हिडिओ शेअर करताना त्यांनी लिहिले, “युवराजच्या विनंतीनुसार, मी त्याच्या वडिलांना (आणि सर्वांना) साखरेचे सेवन कमी करण्याचे आवाहन करतो… निरोगी राहा, आनंदी राहा! आपल्या आरोग्याची काळजी घ्या".
पुढे त्यांनी लिहिले की, "चांगले खा. आरोग्यदायी खा. अतिरिक्त साखरेमुळे अनेक आजार होतात. शिवाय, लठ्ठपणा हा एक गंभीर धोका आहे. तसेच, योगाला तुमच्या जीवनाचा भाग बनवा. तंदुरुस्त आणि सक्रिय राहण्याचा हा एक उत्तम मार्ग आहे."
पंतप्रधान मोदींनी त्याचा व्हिडिओ शेअर केल्यानंतर युवराज दुआने नंतर आपला आनंद व्यक्त केला. त्याने लिहिले, "हा व्हिडिओ इतक्या दूरवर पोहोचला आहे हे अविश्वसनीय आहे. मी याची कधी कल्पनाही केली नव्हती."
