Vegatable Vendor Wins Rs 11 Crore Lottery : राजस्थानातील कोटपुतळी येथील एका भाजी विक्रेत्याचे आयुष्य एका रात्रीत बदलले आहे. अमित सेहरा नावाच्या या विक्रेत्याने मित्राकडून फक्त 1,000 रुपये उसने घेऊन पंजाब राज्य लॉटरीच्या दिवाळी बंपरमध्ये तब्बल 11 कोटी रुपये जिंकले आहेत. नियतीचा हा विलक्षण चमत्कार अमितसाठी आयुष्याला कलाटणी देणारा ठरला आहे.
लॉटरीची तिकिटे आणि मोठा विजय
कोटपुतळीचा रहिवासी असलेला 32 वर्षीय अमित सेहरा हा एका लहान गाडीवरून भाजी विकतो. दिवाळी बंपर 2025 च्या सोडतीदरम्यान, त्याने मित्राकडून 1,000 रुपये उसने घेतले. पंजाब भेटीदरम्यान त्याने स्वतःसाठी आणि पत्नीसाठी दोन लॉटरीची तिकिटे खरेदी केली. यापैकी बठिंडा येथे 500 रुपयांना घेतलेले एक तिकीट 11 कोटी रुपयांचे जॅकपॉट जिंकणारे ठरले, तर दुसऱ्या तिकिटावर त्याला 1,000 रुपये मिळाले.
औपचारिक प्रक्रिया: मिळालेल्या माहितीनुसार, अमित सेहराने लॉटरी जिंकल्याची माहिती मिळताच पंजाब राज्य लॉटरी विभागाच्या अधिकाऱ्यांकडे बक्षिसावर दावा करण्यासाठी आवश्यक कागदपत्रे जमा केली आहेत. रातोरात तो करोडपती बनला आहे.
हेही वाचा – Skydiving Survival Story: 14500 फुटांवरुन पडली पण मुंग्यांमुळे वाचला जीव, नेमकं प्रकरण काय? वाचा सविस्तर
‘माझे सगळे दुःख मिटले’
हा अनपेक्षित विजय मिळाल्यानंतर अमित सेहराने आपली भावना व्यक्त केली. एका वृत्तसंस्थेशी बोलताना अमित म्हणाला, “माझा आनंद मी व्यक्त करू शकत नाही. मी पंजाब सरकार आणि लॉटरी एजन्सीचे आभार मानतो. आज माझे सगळे दुःख मिटले आहे.” तसेच, तो हनुमानभक्त असल्याचेही त्याने सांगितले. त्याचे, “मेरी सारी गरीबी खत्म हो गई” हे भावनिक शब्द ऑनलाइन व्हायरल झाले आहेत.
#WATCH | Chandigarh: Amit Sehara from Rajasthan wins Rs 11 Crore in Punjab Lottery Result Diwali Bumper Prize 2025, says, "… I can't express my happiness. I thank the Punjab government and the lottery agency. All my grief and sorrows have vanished today. I have won Rs 11… pic.twitter.com/jHyfWyfLcp — ANI (@ANI) November 4, 2025
मित्राच्या मुलींसाठी ‘ती’ हृदयस्पर्शी योजना
अमितने लॉटरी जिंकल्यानंतर त्याच्या मनात सर्वप्रथम आलिशान जीवनाचे विचार आले नाहीत, तर त्याला मदत करणाऱ्या मित्राबद्दल कृतज्ञता व्यक्त करण्याचे विचार आले. कर्जाऊ रक्कम परत करण्याऐवजी, त्याने आपल्या मित्राच्या दोन मुलींना प्रत्येकी 50 लाख रुपये देण्याची घोषणा केली आहे.
कृतज्ञता: अमितने सांगितले की, “मी माझी आई गमावली आहे, त्यामुळे मुलींचे दुःख मला समजते. कृतज्ञतेचा हा एक छोटासा भाग म्हणून मी हे पैसे देणार आहे. बाकीचे पैसे मी माझ्या मुलांचे शिक्षण आणि घर बांधण्यासाठी वापरेन.”
या भाजी विक्रेत्याच्या साध्या आणि प्रामाणिक प्रतिसादाने त्याचे अचानक मिळालेले यश आणि भावनिक कृतज्ञता यामुळे त्याला ऑनलाइन जगतात खूप प्रशंसा मिळत आहे. अनेक युजर्सनी त्याच्या या नम्रतेबद्दल त्याचे कौतुक केले आहे.
