पुणे पदवीधरची जागा भाजपच्या पदरात! सुनील तटकरेंकडून तीव्र खंत व्यक्त; म्हणाले ‘हे सामूहिक अपयश…’
Pune Graduate Constituency Election: विधान परिषदेच्या आगामी पदवीधर आणि शिक्षक मतदारसंघाच्या निवडणुकांमुळे राज्यातील राजकीय वातावरण चांगलेच तापले आहे. यातच पुणे पदवीधर मतदारसंघाची हक्काची जागा भारतीय जनता पक्षाच्या वाट्याला गेल्याने राष्ट्रवादी काँग्रेसमध्ये (अजित पवार गट) तीव्र असंतोष पाहायला मिळत आहे. या संपूर्ण राजकीय घडामोडींवर राष्ट्रवादीचे प्रदेशाध्यक्ष खासदार सुनील तटकरे यांनी अत्यंत स्पष्ट शब्दांत आपली भूमिका मांडली आहे. ही जागा पक्षाच्या हातातून निसटणे हे आपल्या सर्वांचे ‘सामूहिक अपयश’ असल्याचे सांगत त्यांनी महायुतीच्या जागावाटपातील चर्चेवर आणि अंतर्गत समन्वयावर उघडपणे खंत व्यक्त केली आहे.
हेही वाचा – अमरावती शिक्षक मतदारसंघात महायुतीत मोठा उद्रेक! तब्बल 8 बंडखोर निवडणुकीच्या रिंगणात
ऐनवेळी भाजपचे धक्कातंत्र; स्मिता जाधव यांची उमेदवारी अन् शरद लाड यांचे बंड
पुणे पदवीधर मतदारसंघात भाजपने अत्यंत अनपेक्षितपणे स्मिता जाधव यांना निवडणुकीच्या रिंगणात उतरवून राजकीय धक्का दिला आहे. त्यांनी पुण्यातील विभागीय आयुक्त कार्यालयात आपला उमेदवारी अर्ज अधिकृतपणे दाखल केला. मात्र, दुसरीकडे या जागेसाठी सुरुवातीपासून इच्छुक असलेले आमदार अरुण लाड यांचे सुपुत्र शरद लाड यांनीदेखील आपला अपक्ष अर्ज भरल्याने महायुतीतील अंतर्गत मतभेद चव्हाट्यावर आले आहेत. महायुतीत निर्माण झालेल्या या गोंधळामुळे आणि राष्ट्रवादीचा पारंपरिक मतदारसंघ भाजपला सुटल्यामुळे पक्षातील स्थानिक कार्यकर्ते व नेत्यांमध्ये मोठी अस्वस्थता पसरली आहे.
‘जागा मिळणे गरजेचेच होते, पण निर्णय वरिष्ठांचा;’ तटकरेंचे स्पष्टीकरण
पत्रकारांशी संवाद साधताना सुनील तटकरे यांनी सांगितले की, 5 वर्षांपूर्वी झालेल्या निवडणुकीत राष्ट्रवादी काँग्रेसचे उमेदवार या मतदारसंघातून विजयी झाले होते. त्यामुळे या जागेवर पक्षाचा पारंपरिक आणि नैसर्गिक दावा होता. “चर्चेच्या अंतिम टप्प्यात आम्ही नक्कीच कमी पडलो, हे सत्य नाकारता येणार नाही. ही जागा राष्ट्रवादीला मिळायलाच हवी होती, कारण येथील मतदार हा पक्षाचा पाठीराखा आहे,” असे ते म्हणाले. मात्र, हा अंतिम निर्णय राज्याचे मुख्यमंत्री आणि दोन्ही उपमुख्यमंत्र्यांच्या पातळीवर झालेल्या बैठकीत घेण्यात आल्याचे स्पष्ट करत तटकरेंनी वरिष्ठ नेतृत्वाच्या भूमिकेकडे लक्ष वेधले.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.