भारतीय शेअर बाजारासाठी हा आठवडा अत्यंत निराशाजनक आणि तोट्याचा ठरला आहे. दसऱ्याच्या सुट्टीमुळे या आठवड्यात केवळ 4 दिवसच प्रत्यक्ष व्यवहार झाले, मात्र या चारही सत्रांमध्ये बाजारात जोरदार घसरण पाहायला मिळाली. पश्चिम आशियातील वाढता भू-राजकीय तणाव आणि त्यामुळे जागतिक बाजारात कच्च्या तेलाच्या किमतीत झालेली मोठी वाढ, यामुळे भारतीय शेअर बाजारात गुंतवणूकदारांकडून प्रचंड विक्रीचा दबाव निर्माण झाला. या अवघ्या 4 दिवसांच्या घसरणीमुळे शेअर बाजारातील गुंतवणूकदारांचे सुमारे 20,78,774.28 कोटी रुपये म्हणजेच जवळपास 21 लाख कोटी रुपयांचे (21 ट्रिलियन रुपये) मोठे नुकसान झाले आहे.
निफ्टी आणि सेन्सेक्समध्ये मोठी घसरण
शुक्रवारी सलग चौथ्या दिवशी बाजारात मंदीचे वातावरण राहिले. या दिवशी बीएसई सेन्सेक्स (BSE Sensex) 125.56 अंकांनी म्हणजेच 0.17 टक्क्यांनी घसरून 73,123.83 अंकांवर बंद झाला. तर नॅशनल स्टॉक एक्सचेंजचा निफ्टी (Nifty) 87.65 अंकांनी म्हणजेच 0.39 टक्क्यांनी खालावून 22,600 अंकांवर स्थिरावला. संपूर्ण आठवड्याचा विचार केल्यास, सेन्सेक्समध्ये 1,605.44 अंकांची (2.15 टक्के) मोठी घसरण नोंदवली गेली. या सत्रांदरम्यान बीएसईवर सूचीबद्ध कंपन्यांचे एकूण बाजार भांडवल जे 16 ऑक्टोबर रोजी 4,72,62,167.42 कोटी रुपये होते, ते घसरून 4,51,83,393.14 कोटी रुपयांवर खाली आले आहे.
तज्ज्ञांकडून चिंतेचा इशारा
मोतीलाल ओसवाल फायनान्शिअल सर्व्हिसेसचे संशोधन प्रमुख सिद्धार्थ खेमका यांनी दिलेल्या माहितीनुसार, जागतिक स्तरावरील युद्धजन्य परिस्थिती आणि कच्च्या तेलाच्या किमतीतील वाढ यामुळे महागाई वाढण्याची शक्यता निर्माण झाली आहे. अमेरिका आणि इराण यांच्यातील वाढता तणाव तसेच इराणच्या लष्करी व अणू प्रकल्पांवर संभाव्य हल्ल्यांच्या बातम्यांमुळे जागतिक बाजारात अनिश्चितता वाढली आहे. याचा थेट परिणाम इंधनाच्या दरांवर झाला असून, ‘ब्रेंट क्रूड’च्या किमती 3 टक्क्यांनी वाढून प्रति बॅरल 116.73 डॉलर्सवर पोहोचल्या आहेत.
हेही वाचा – ग्राहकांना मोठा दिलासा! दिवाळीपूर्वी सोने-चांदीच्या दरात घसरण; 10 ग्रॅमचा दर आता..
आठवडाभरातील बाजाराची दैनिक कामगिरी
आठवड्याची सुरुवात सोमवारी मोठ्या घसरणीने झाली, जेव्हा सेन्सेक्स 876.37 अंकांनी घसरून 73,852.90 अंकांवर आणि निफ्टी 257.20 अंकांनी घटून 22,888.95 अंकांवर बंद झाला. मंगळवारी दसऱ्याच्या सणामुळे बाजार बंद होता. त्यानंतर बुधवारी सेन्सेक्स 143.21 अंकांनी घसरून 73,709.69 वर, तर गुरुवारी 460.30 अंकांनी घटून 73,249.39 वर आला. शुक्रवारीही ही घसरण कायम राहिल्याने गुंतवणूकदारांच्या संपत्तीला मोठा फटका बसला आहे.
