तमिळनाडूमधील वालपरई येथे भीषण पर्यटन व्हॅन अपघात झाला असून या दुर्घटनेत 10 जणांचा मृत्यू झाला आहे. केरळमध्ये नोंदणीकृत असलेली ही व्हॅन वालपरई-पोल्लाची घाट रस्त्यावर अपघातग्रस्त झाली. दुर्घटनेच्या वेळी व्हॅनमध्ये सुमारे 20 पर्यटक प्रवास करत होते. त्यामुळे मृतांचा आकडा वाढण्याची भीती व्यक्त केली जात आहे.
हा अपघात कोयंबतूर जिल्ह्यातील वालपरई परिसरात घडला. प्राथमिक माहितीनुसार, घाट रस्त्यावरील 13व्या हेअरपिन वळणावर चालकाचा वाहनावरील ताबा सुटला. त्यानंतर व्हॅन खोल दरीच्या दिशेने घसरत 9व्या वळणापर्यंत खाली गेली. रस्त्यावर तीव्र वळण असल्यामुळे वाहन थेट नियंत्रणाबाहेर गेल्याचे सांगितले जात आहे.
या अपघातात व्हॅन चा पूर्ण चक्काचूर झाला. वाहनाचे मोठ्या प्रमाणात नुकसान झाले असून अनेक प्रवासी रस्त्यावर फेकले गेले. घटनास्थळी मृतदेह विखुरलेल्या अवस्थेत आढळल्याने परिसरात भीतीचे वातावरण निर्माण झाले.
हेही वाचा: Crude Oil Price Drop: होर्मुझ सामुद्रधुनी सुरू झाल्यानंतर कच्च तेलाच्या किंमतीत मोठी घसरण, पेट्रोल-डिझेल स्वस्त होण्याची शक्यता
पोलिसांनी दिलेल्या माहितीनुसार, व्हॅनमधील सर्व प्रवासी केरळमधील मलप्पुरम जिल्ह्यातील रहिवासी होते. मात्र हे सर्वजण एकाच कुटुंबातील होते की मित्रमंडळी किंवा परिचित होते, याबाबत अद्याप स्पष्ट माहिती समोर आलेली नाही.
अपघातानंतर स्थानिक नागरिकांनी तातडीने मदतकार्य सुरू केले. पोलिस आणि बचाव पथकांनी घटनास्थळी धाव घेत जखमींना जवळच्या रुग्णालयात दाखल केले. अनेक जखमींची प्रकृती गंभीर असल्याचे सांगितले जात आहे. या प्रकरणी पोलिसांनी तपास सुरू केला असून मृत आणि जखमींच्या नातेवाईकांशी संपर्क साधण्याचे काम सुरू आहे.
हेही वाचा: MHADA New City: मोतीलाल नगरचा कायापालट; मुंबईत साकारणार देशातील सर्वात मोठा '15 मिनिट सिटी' पुनर्विकास प्रकल्प