मुंबई: म्हाडाने गोरेगावमधील मोतीलाल नगर पुनर्विकास प्रकल्पाचा मास्टर प्लॅन सादर केला आहे. सुमारे 143 एकर परिसरात पसरलेला हा प्रकल्प देशातील सर्वात मोठ्या शहरी पुनर्विकास योजनांपैकी एक मानला जात आहे. या प्रकल्पाची अंमलबजावणी बांधकाम आणि विकास योजनेअंतर्गत केली जाणार असून, त्यात अदानी ग्रुप खासगी भागीदार म्हणून सहभागी आहे. मात्र जमिनीची मालकी पूर्णपणे म्हाडा कडेच राहणार आहे.
मोतीलाल नगर प्रकल्पाचा मास्टर प्लॅन जवळपास अंतिम टप्प्यात असून स्थानिक रहिवाशांच्या सूचनांनुसार काही बदल केले जाऊ शकतात. राज्य सरकारने स्पष्ट केले आहे की, या योजनेत पुनर्वसनाला सर्वाधिक प्राधान्य दिले जाईल आणि पात्र रहिवाशांच्या पुनर्वसनाची पूर्ण जबाबदारी म्हाडा घेणार आहे.
या प्रकल्पाचे सर्वात मोठे वैशिष्ट्य म्हणजे ‘15 मिनिट सिटी’ संकल्पना. या संकल्पनेनुसार शाळा, रुग्णालये, बाजारपेठ, उद्याने आणि इतर आवश्यक सुविधा 15 मिनिटांच्या अंतरात उपलब्ध होतील. गुणवत्तेची खात्री करण्यासाठी IIT मुंबई आणि नामांकित संस्थांनाही जोडण्यात आले आहे.
हेही वाचा: Dugout Rules: BCCI ची राजस्थान रॉयल्सच्या व्यवस्थापकावर मोठी कारवाई; 'या' कारणामुळे ठोठावला 1 लाखांचा दंड
मोतीलाल नगरमधील इमारती 1960 च्या दशकात बांधण्यात आल्या होत्या. आता त्या जर्जर झाल्या असून रस्ते, पाणीपुरवठा, ड्रेनेज आणि इतर नागरी सुविधा आधुनिक निकषांनुसार नाहीत. या भागात अनधिकृत बांधकामे आणि पावसाळ्यातील पाणी साचण्याच्या समस्याही मोठ्या प्रमाणात आहेत. या सर्व अडचणी दूर करण्यासाठी हा प्रकल्प राबवला जात आहे.
या योजनेत झोपडपट्टी पुनर्वसन प्राधिकरणाच्या तरतुदींचाही समावेश करण्यात आला आहे. त्याअंतर्गत सुमारे 1600 झोपडपट्टीधारकांचे पुनर्वसन केले जाणार आहे. जास्तीत जास्त लोकांना त्याच परिसरात घरे देण्याचा प्रयत्न केला जाणार असल्यामुळे विस्थापन कमी होईल.
या प्रकल्पात सुमारे 15 एकर हरित क्षेत्र, आधुनिक पायाभूत सुविधा, सांडपाणी प्रक्रिया प्रकल्प, रेनवॉटर हार्वेस्टिंग, सौर ऊर्जा आणि स्मार्ट सुरक्षा व्यवस्था उभारण्यात येणार आहे. हा प्रकल्प ‘लिव्ह, वर्क अँड प्ले’ या आधुनिक शहरी जीवनशैलीच्या संकल्पनेवर आधारित असेल.
म्हाडाच्या मते, हा प्रकल्प पूर्ण होण्यासाठी सुमारे सात वर्षे किंवा त्याहून अधिक कालावधी लागू शकतो. त्यामुळे मुंबईच्या शहरी विकासात हा एक ऐतिहासिक आणि महत्त्वपूर्ण टप्पा मानला जात आहे.
हेही वाचा: Crude Oil Price Drop: होर्मुझ सामुद्रधुनी सुरू झाल्यानंतर कच्च तेलाच्या किंमतीत मोठी घसरण, पेट्रोल-डिझेल स्वस्त होण्याची शक्यता