साऊथ सेंट्रल रेल्वेने महाराष्ट्रातील औरंगाबाद रेल्वे स्टेशनचे नाव अधिकृतरित्या बदलण्यास मंजुरी मिळाल्याची माहिती जाहीर केली आहे. आता हे स्टेशन ‘छत्रपती संभाजीनगर रेल्वे स्टेशन’ या नावाने ओळखले जाईल. या स्टेशनचा नवा कोड CPSN असा असेल, अशी माहिती दक्षिण मध्य रेल्वेचे मुख्य जनसंपर्क अधिकारी ए. श्रीधर यांनी प्रसिद्धीपत्रकाद्वारे दिली.
रेल्वे प्रशासनाने दिलेल्या माहितीनुसार, महाराष्ट्र सरकारच्या शिफारसी आणि केंद्रीय गृह मंत्रालयाच्या मंजुरीनंतर हा निर्णय औपचारिकरित्या लागू करण्यात आला आहे. सर्व प्रशासकीय प्रक्रिया पूर्ण झाल्याने त्वरित स्टेशनचे सर्व तिकीट, सूचना फलक, प्लॅटफॉर्मवरील घोषणा आणि रेल्वेच्या सॉफ्टवेअरमध्ये स्टेशनचे नाव बदलले गेले आहे. औरंगाबाद रेल्वे स्टेशनचा जुना कोड 'AWB' हा होता, आता नवीन नावानुसार तो 'CPSN' असा असेल.
नव्या नावामागील उद्देश म्हणजे छत्रपती शिवाजी महाराजांचे पुत्र आणि मराठा साम्राज्याचे दुसरे छत्रपती, छत्रपती संभाजी महाराज यांच्या शौर्याचा ऐतिहासिक सन्मान करणे हा आहे. प्रवासी सेवा आणि नकाशे यासह सर्व अधिकृत नोंदींमध्ये आता ‘छत्रपती संभाजीनगर’ हेच नाव दिसणार आहे.
हेही वाचा: Pune Jain Land Row : रवींद्र धंगेकर मोहोळांना म्हणाले पक्ष आदेशानुसार आता एकतर जैन मंदिर वाचवा नाहीतर स्वतःचे मंत्रीपद.. धंगेकरांनी ट्विट करत वातावरण पुन्हा तापवलं
याआधी 2022 मध्ये केंद्र सरकारने औरंगाबाद शहराचे नावही ‘छत्रपती संभाजीनगर’ असे करण्याचा निर्णय घेतला होता. आता रेल्वे स्थानकाचे नाव बदलल्याने हा बदल पूर्णत्वास गेला आहे. महायुती सरकारच्या काळात, मुख्यमंत्र्यांच्या मार्गदर्शना अंतर्गत याबाबतची गॅझेट अधिसूचना जारी करण्यात आली होती.
इतिहासात डोकावले तर औरंगाबादचे नाव पूर्वी मुघल सम्राट औरंगजेबच्या नावावर ठेवले गेले होते. रेल्वे स्टेशनची स्थापना अंदाजे 1900 साली निजाम मीर उस्मान अली खान यांच्या कारकिर्दीत झाली होती. आजचे छत्रपती संभाजीनगर हे एक महत्त्वाचे पर्यटन केंद्र असून, युनेस्कोने मान्यता दिलेल्या अजिंठा आणि वेरूळच्या लेण्यांसह अनेक ऐतिहासिक वारसा स्थळांनी हे शहर सुशोभित आहे.
या निर्णयामुळे स्थानिक जनतेसह महाराष्ट्रातील सर्वांनीच समाधान व्यक्त केले आहे, स्थानिक ऐतिहासिक वारशाला योग्य तो दर्जा दिल्याचे मत व्यक्त केले जात आहे.
हेही वाचा: 1st November New Rules : 1 नोव्हेंबरपासून होणार 'हे' मोठे बदल ; गृहिणींची चिंता वाढणार की क्रेडिट कार्डचे शुल्क ? जाणून घ्या