Pune Traffic : चाकण आणि तळेगाव या औद्योगिक पट्ट्यात दररोज तासनतास वाहतूक कोंडीत अडकणाऱ्या पुणेकरांसाठी आणि कामगारांसाठी एक अत्यंत दिलासादायक बातमी आहे. या भागातील वाहतुकीचा कणा असलेल्या चाकण-तळेगाव-शिक्रापूर मार्गावरील ताण कमी करण्यासाठी महाराष्ट्र औद्योगिक विकास महामंडळाने (MIDC) हाती घेतलेला पर्यायी रस्त्याचा प्रकल्प आता अंतिम टप्प्यात पोहोचला आहे.
नेमका बदल काय होणार?
सध्या तळेगाव औद्योगिक क्षेत्रातील वाहतूक नवलाख उंबरे गावातील अरुंद रस्त्यावरून होते, ज्यामुळे तिथे वाहनांच्या लांबच लांब रांगा लागतात. यावर उपाय म्हणून MIDC ने खालील महत्त्वाचे बदल केले आहेत:
गावाबाहेरून बायपास: नवलाख उंबरे गावाबाहेरून 1.7 किलोमीटर लांबीचा सहापदरी सिमेंट काँक्रीटचा रस्ता तयार करण्यात आला आहे.
थेट कनेक्टिव्हिटी: हा नवा मार्ग जुन्या मुंबई-पुणे महामार्गाला थेट पुणे-नाशिक महामार्गाशी जोडणार आहे. यामुळे देहूरोडकडून तळेगाव औद्योगिक क्षेत्रात जाणाऱ्या वाहनांना मोठा दिलासा मिळेल.
विस्तारीकरण: कॉर्निंग कंपनीपासून भामा नदीपर्यंत सुमारे 6 किलोमीटरचा चारपदरी रस्ता विकसित केला जात आहे, जो चाकण टप्पा 5 ला जोडला जाईल.
प्रकल्पाचे अर्थकारण आणि महत्त्व
दरम्यान, MIDC चे अधीक्षक अभियंता नीलेश मोढवे यांनी दिलेल्या माहितीनुसार, या पायाभूत सुविधांमुळे औद्योगिक क्षेत्राचा चेहरामोहरा बदलणार आहे. MIDC कडून राबवण्यात येत असलेल्या या महत्त्वाकांक्षी प्रकल्पासाठी सुमारे 50 कोटी रुपयांचा भरीव निधी खर्च करण्यात येत आहे. याअंतर्गत पूर्णपणे उच्च दर्जाचा सिमेंट काँक्रीट रस्ता विकसित केला जात असून, तो अवजड वाहतुकीचा भार पेलण्यासाठी सक्षम असेल. या प्रकल्पामुळे होणारा सर्वात मोठा फायदा म्हणजे, औद्योगिक क्षेत्रातील अवजड वाहनांची रवानगी आता थेट गावाबाहेरून होणार असल्याने अंतर्गत रस्त्यांवरील ताण कमी होईल आणि प्रवाशांच्या वेळेची मोठी बचत होईल. प्रामुख्याने या परिसरातील कामगार, उद्योजक आणि स्थानिक नागरिक यांच्या दैनंदिन प्रवासातील अडथळे दूर करण्याच्या उद्देशाने हा मार्ग तयार करण्यात येत आहे.
हेही वाचा - Supriya Sule : अजितदादांच्या मृत्यूवर रोहित पवारांचे खळबळजनक दावे; सुप्रिया सुळेंनी सरकारकडे केली मोठी मागणी
उद्योजक आणि कामगारांमध्ये आनंदाचे वातावरण
चाकण आणि तळेगाव हे आशियातील महत्त्वाचे ऑटोमोबाईल हब मानले जातात. मात्र, रस्ते अरुंद असल्याने उत्पादनांची ने-आण करताना कंपन्यांना मोठा फटका बसत होता. आता या नवीन लिंक रोडमुळे मालाची वाहतूक जलद होईल. "दररोजचा मनस्ताप थांबणार असून प्रशासनाने हा रस्ता लवकरात लवकर खुला करावा," अशी मागणी आता कामगार वर्गातून होत आहे. या नवीन 'गेमचेंजर' रस्त्यामुळे चाकण-तळेगाव पट्ट्यातील प्रवासाचा वेग वाढणार असून, औद्योगिक विकासाला नवी गती मिळणार आहे.