Devendra Fadnavis: एल निनोचं संकटाबाबत मुख्यमंत्री देवेंद्र फडणवीसांची महत्त्वाची माहिती; नेमकं काय म्हणाले?
Devendra Fadnavis: देशासह महाराष्ट्रावर निर्माण झालेले एल निनोचे सावट अधिक तीव्र होण्याचा इशारा भारतीय हवामान विभागाने (IMD) दिला आहे. या पार्श्वभूमीवर राज्याचे मुख्यमंत्री देवेंद्र फडणवीस यांनी महत्त्वपूर्ण विधान केले आहे. पॅसिफिक महासागरातील तापमानवाढीमुळे उद्भवलेला एल निनो आगामी फेब्रुवारी महिन्यापर्यंत अधिक तीव्र होत जाईल, आणि त्यानंतर फेब्रुवारीनंतर ही तीव्रता हळूहळू कमी होण्यास सुरुवात होईल, असे मुख्यमंत्र्यांनी स्पष्ट केले. एल निनोच्या वाढत्या प्रभावामुळे निर्माण होणाऱ्या आव्हानांचा सामना करण्यासाठी राज्य प्रशासनाला सर्व प्रकारच्या आपत्कालीन उपाययोजनांसाठी पूर्णपणे सतर्क राहण्याच्या सूचना देण्यात आल्या आहेत.
12 तातडीच्या उपाययोजनांना राज्य सरकारची मान्यता
राज्यातील पावसाच्या खंडामुळे निर्माण झालेल्या बिकट परिस्थितीचा आढावा घेत सरकारने 265 तालुके दुष्काळग्रस्त घोषित केले आहेत. या सर्व बाधित भागांत शेतकऱ्यांना सरसकट सरकारी मदत पोहोचवली जाणार असल्याचे मुख्यमंत्र्यांनी सांगितले. तातडीने अंमलबजावणी करण्यासाठी 12 प्रमुख उपाययोजनांना मंजुरी देण्यात आली असून ट्रिगर 1 अंतर्गत प्रशासकीय आदेश जारी करण्यात आले आहेत. पिकांच्या नुकसानीचे पंचनामे वेगाने सुरू असून, ज्या गावांची नावे सध्याच्या यादीत सुटली आहेत, त्यांची पाहणी करून ट्रिगर 3 अंतर्गत समावेश केला जाईल; त्यामुळे एकही बाधित शेतकरी मदतीपासून वंचित राहणार नाही, असे आश्वासन त्यांनी दिले.
हेही वाचा – Devendra Fadnavis : 265 दुष्काळग्रस्त तालुक्यांना सरसकट मदत; उर्वरित तालुक्यांसाठी फडणवीसांचा मोठा निर्णय
पाणी साठ्याचे सूक्ष्म नियोजन
दुष्काळाची भीषणता लक्षात घेता महसूल मंत्री राधाकृष्ण विखे पाटील यांनी नागरिकांना लग्नसमारंभ साध्या पद्धतीने पार पाडण्याचे आवाहन केले आहे. यावर बोलताना मुख्यमंत्र्यांनी सर्वांनी संवेदनशील राहून अनावश्यक खर्च टाळण्याचे समर्थन केले. तसेच, राज्यातील धरणांमधील उपलब्ध पाणीसाठा जुलै-ऑगस्ट 2027 पर्यंत पुरेल या दृष्टीने प्रत्येक जिल्ह्याचा स्वतंत्र पाणी आराखडा तयार करण्यास सांगण्यात आले आहे. ज्या मोठ्या धरणांमध्ये अतिरिक्त साठा आहे, तेथे पिण्याच्या पाण्याचे आरक्षण सुरक्षित ठेवून उर्वरित पाणी रब्बी हंगाम आणि उद्योगांसाठी वापरण्याचा निर्णय स्थानिक गरजेनुसार घेतला जाईल.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.