October Heat: 1 ऑक्टोबरपासून उकाड्याचा तडाखा! महाराष्ट्रासाठी हवामान खात्याचा नवा अंदाज
मुंबई: सप्टेंबर महिन्याच्या अखेरीस राज्यात पुन्हा उकाड्याचा जोर वाढण्याची शक्यता हवामान खात्याने व्यक्त केली आहे. सध्या अनेक भागांत पावसामुळे वातावरणात काहीसा गारवा जाणवत असला, तरी ऑक्टोबरच्या पहिल्या आठवड्यापासून कमाल आणि किमान तापमानात वाढ होण्याचे संकेत आहेत. त्यामुळे दरवर्षी जाणवणाऱ्या ‘ऑक्टोबर हिट’चा अनुभव यंदाही राज्यातील नागरिकांना येऊ शकतो.
देशभरात नैऋत्य मान्सून आता टप्प्याटप्प्याने माघारी फिरत आहे. उत्तर भारतातील अनेक भागांतून मान्सूनची माघार सुरू झाल्याने हवामानात बदल दिसून येत आहेत. दुसरीकडे बंगालच्या उपसागरात निर्माण झालेल्या कमी दाबाच्या क्षेत्रामुळे महाराष्ट्रात अद्याप काही भागांत पावसाची शक्यता कायम आहे. यामुळे सध्या तापमानात मोठी वाढ जाणवत नसली, तरी हा दिलासा फार काळ टिकणार नसल्याचे चित्र आहे.
भारतीय हवामान विभागाने ऑक्टोबरच्या पहिल्या तीन आठवड्यांसाठी दिलेल्या अंदाजानुसार, १ ऑक्टोबरनंतर राज्यातील अनेक भागांत तापमान सरासरीपेक्षा अधिक राहू शकते. विशेषतः कोकण, पश्चिम महाराष्ट्र, मराठवाडा आणि विदर्भात उकाड्याची तीव्रता वाढण्याची शक्यता व्यक्त करण्यात आली आहे.
२५ सप्टेंबर ते १ ऑक्टोबर या कालावधीत विदर्भ आणि मराठवाड्यात अधूनमधून पावसामुळे काही प्रमाणात दिलासा मिळू शकतो. मात्र, २ ऑक्टोबरपासून हवामानात बदल होत तापमानाचा पारा चढू लागण्याची शक्यता आहे. किनारपट्टी भागात आर्द्रतेमुळे उकाडा अधिक जाणवू शकतो, तर राज्याच्या अंतर्गत भागांत उन्हाचा तडाखा वाढण्याची शक्यता आहे.
कमाल तापमानाबरोबरच किमान तापमानातही वाढ होण्याची चिन्हे आहेत. सुरुवातीला रात्रीचे तापमान फारसे बदलणार नसले, तरी ऑक्टोबरच्या दुसऱ्या आठवड्यानंतर रात्रीही उबदार वातावरण राहू शकते. त्यामुळे दिवसभराचा उकाडा आणि रात्रीची उष्णता नागरिकांना अधिक त्रासदायक ठरू शकते.
दरम्यान, हवामान विभागाने वायव्य भारतातही ऑक्टोबरच्या सुरुवातीला तापमानाचा जोर वाढण्याचा अंदाज व्यक्त केला आहे. राजस्थान, हरियाणा, पंजाब आणि मध्य भारतातील काही भागांत कमाल तापमान सरासरीपेक्षा दोन ते चार अंशांनी अधिक नोंदवले जाण्याची शक्यता आहे. या भागांत मान्सूनची माघार वेगाने होत असल्याने उष्णतेचा प्रभाव अधिक जाणवू शकतो.
तज्ज्ञांच्या मते, ‘ऑक्टोबर हिट’ हा मान्सून माघारी फिरल्यानंतर निर्माण होणारा नैसर्गिक हवामानाचा टप्पा आहे. या काळात आकाश स्वच्छ होत असल्याने सूर्यप्रकाशाचा परिणाम अधिक जाणवतो आणि आर्द्रतेमुळे उकाडाही वाढतो.
येत्या काही दिवसांत हवामानात झपाट्याने बदल होण्याची शक्यता असल्याने नागरिकांनी पुरेसे पाणी पिणे, दुपारच्या तीव्र उन्हात अनावश्यक बाहेर जाणे टाळणे आणि उष्णतेपासून बचावासाठी आवश्यक काळजी घेण्याचा सल्ला तज्ज्ञांनी दिला आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.