Kolhapur-Mumbai Flight : कोल्हापूरची अंबाबाई आणि नवी मुंबईचे सिडको शहर आता एकमेकांशी थेट जोडले जाणार आहेत. नवी मुंबई आंतरराष्ट्रीय विमानतळावरून कोल्हापूरसाठी बहुप्रतिक्षित थेट विमानसेवा सुरू होत असून, इंडिगो कंपनीने याचे अधिकृत वेळापत्रक जाहीर केले आहे. विशेष म्हणजे, 29 मार्चपासून या मार्गावर दररोज 2 विमाने उड्डाण करणार असून प्रवाशांसाठी तिकीट बुकिंगही आता खुले झाले आहे.
प्रवासाचा वेळ वाचणार, पर्यटनाला येणार बहर
आतापर्यंत कोल्हापूर ते मुंबई प्रवासासाठी रेल्वे किंवा रस्ते मार्गाने 7 ते 8 तासांचा वेळ खर्ची घालावा लागत असे. मात्र, या नव्या हवाई सुविधेमुळे अवघ्या 1 तास 15 मिनिटांत हे अंतर पार करता येईल. याचा सर्वाधिक फायदा कोल्हापूरला दर्शनासाठी जाणाऱ्या भाविकांना आणि कामानिमित्त मुंबईत येणाऱ्या व्यावसायिकांना होणार आहे. मुंबईकरांसाठी आता महालक्ष्मी दर्शन केवळ एका तासाच्या अंतरावर आले आहे.
विमानांचे सविस्तर वेळापत्रक
नवी मुंबई ते कोल्हापूर या मार्गावर पहिली विमानसेवा सकाळी 8:00 वाजता असून ते सकाळी 9:15 वाजता कोल्हापुरात पोहोचेल. त्यानंतर दुसरी सेवा सायंकाळी 7:20 वाजता असून ती रात्री 8:30 वाजता कोल्हापूर विमानतळावर उतरेल. परतीच्या प्रवासासाठी कोल्हापूर ते नवी मुंबई या मार्गावर पहिले विमान सकाळी 9:35 वाजता प्रस्थान करेल आणि सकाळी 10:35 वाजता नवी मुंबईत पोहोचेल. तसेच, रात्रीच्या सत्रात कोल्हापूरवरून रात्री 8:50 वाजता विमान सुटेल आणि रात्री 9:50 वाजता नवी मुंबईत दाखल होईल.
व्यापार आणि उद्योगाला मिळणार 'बूस्टर'
या विमानसेवेमुळे केवळ प्रवाशांची सोयच झाली नाही, तर दोन्ही शहरांमधील आर्थिक नात्यालाही नवी उभारी मिळणार आहे. यामुळे होणारे मुख्य फायदे खालीलप्रमाणे आहेत:
वेळेची बचत: सकाळी मुंबईहून निघून कोल्हापुरातील कामे आटोपून रात्री पुन्हा घरी परतणे आता शक्य होणार आहे.
पर्यटन वृद्धी: जोतिबा, अंबाबाई मंदिर आणि पन्हाळा यांसारख्या पर्यटन स्थळांना भेट देणे मुंबईकरांसाठी अधिक सुलभ होईल.
औद्योगिक विकास: कोल्हापूरच्या उद्योगांना मुंबईच्या जागतिक बाजारपेठेशी जोडण्यासाठी हा 'फास्ट ट्रॅक' मार्ग ठरणार आहे.
हेही वाचा – Mumbai AC Local: हार्बर लाईनवर महिन्याभरापासून वेळापत्रक कोलमडले, एसी लोकलमुळे प्रवाशांचा पारा चढला
अनेक वर्षांपासूनची प्रवाशांची ही मागणी आता पूर्ण होत आहे. जलद, सुरक्षित आणि सोयीस्कर प्रवासाचा हा पर्याय पश्चिम महाराष्ट्राच्या विकासासाठी मैलाचा दगड ठरेल, असा विश्वास व्यक्त केला जात आहे.
