नागपुरात होणाऱ्या हिवाळी अधिवेशनाच्या तयारीसाठी सार्वजनिक बांधकाम विभागाने 42.15 कोटी रुपयांच्या अतिरिक्त कामांना मंजुरी दिली आहे. त्यामुळे अधिवेशनाचा खर्च 86.90 कोटींवरून 129.05 कोटी रुपयांवर जाणार आहे. राज्यात दुष्काळाचे संकट असताना खर्चात झालेल्या या वाढीमुळे सरकारच्या खर्चकपातीच्या भूमिकेवर प्रश्न उपस्थित होण्याची शक्यता आहे.
समृद्धी महामार्गावर जानेवारी ते सप्टेंबर 2026 या नऊ महिन्यांत 168 अपघातांची नोंद झाली असून, 143 जणांचा मृत्यू झाला आहे. मागील वर्षी याच कालावधीत 151 अपघातांत 126 जणांचा मृत्यू झाला होता. अपघातांत 11 टक्के, तर मृतांच्या संख्येत 13 टक्के वाढ झाल्याने महामार्गावरील सुरक्षा उपायांच्या परिणामकारकतेवर प्रश्नचिन्ह निर्माण झाले आहे.
वसमत-परभणी महामार्गावरील नांदगाव परिसरात नांदेड-बीड ई-बसने कट मारल्याने वसमतहून परभणीकडे जाणारी लालपरी थेट शेतात घुसली. समोरून ट्रॅक्टर येत असताना ई-बस ओव्हरटेक करत असल्याची माहिती आहे. यावेळी महिला बसचालकाने प्रसंगावधान राखत बस शेतात वळवली. सुदैवाने चालक, वाहक आणि सर्व प्रवासी सुखरूप बचावले.
सिंधुदुर्ग जिल्ह्यातील आंबोली घाटात दाट धुक्याची चादर पसरली असून, परिसरात आल्हाददायक गारवा निर्माण झाला आहे. सह्याद्रीच्या डोंगररांगांमध्ये ढगांमधून प्रवास करण्याचा अनोखा अनुभव घेण्यासाठी महाराष्ट्रासह गोवा आणि कर्नाटकातील पर्यटक आंबोलीत दाखल होत आहेत. दऱ्यांमधील ढग आणि निसर्गसौंदर्य पर्यटकांचे आकर्षण ठरत आहे.
गोंदिया जिल्ह्यातील अर्जुनी मोरगाव तालुक्यातील प्रतापगड येथील 36 वर्षीय उमेश रामटेके याला नऊ वर्षांच्या मुलीवरील लैंगिक अत्याचारप्रकरणी जिल्हा व सत्र न्यायालयाने सक्तमजुरीसह जन्मठेपेची शिक्षा सुनावली. वृद्ध आईला धमकी दिल्याच्या प्रकरणातही न्यायालयाने शिक्षा सुनावली आहे. केशोरी पोलिसांनी केलेल्या तपास आणि सबळ पुराव्यांमुळे या प्रकरणात दोषसिद्धी झाली.
सिंधुदुर्ग जिल्ह्यातील कुडाळ तालुक्याच्या सह्याद्री पट्ट्यासह नारुर, घोटगे पंचक्रोशी आणि माणगाव खोऱ्यात काल रात्री वादळी वाऱ्यासह जोरदार पाऊस झाला. भातकापणी अंतिम टप्प्यात असताना पावसामुळे भातशेतीचे मोठे नुकसान झाले आहे. वादळी वाऱ्यामुळे काही भागांतील वीजपुरवठाही खंडित झाला. सकाळपासून पावसाने उसंत घेतली असून, जिल्ह्यात आज पावसाचा येलो अलर्ट जारी करण्यात आला आहे.
अमरावती जिल्ह्यातील भातकुली तालुक्यातील निरूळ गंगामाई येथे 65 वर्षीय अल्पभूधारक शेतकरी श्रीपतराव कडू यांनी विषारी औषध प्राशन करून टोकाचं पाऊल उचललं. अनियमित पाऊस, सोयाबीन पिकाचं नुकसान आणि दोन लाख रुपयांहून अधिक कर्जामुळे ते आर्थिक संकटात होते. पीडित शेतकरी कुटुंबाला तातडीने आर्थिक मदत देण्याची मागणी होत आहे.
मुंबई महानगर प्रदेशातील वायुप्रदूषण कमी करण्यासाठी राज्य सरकारने महापालिकांना विशेष मोहीम राबवण्याचे आदेश दिले आहेत. रस्त्यांची व्हॅक्यूम क्लिनिंग, पाण्याची फवारणी, बांधकामाच्या राडारोड्यावर नियंत्रण आणि वाहनांच्या प्रदूषणावर कठोर उपाययोजना केल्या जाणार आहेत. तसेच, लाकूड व कोळशावर चालणाऱ्या आणि स्वच्छ इंधनावर रूपांतरित न झालेल्या बेकऱ्यांवर थेट कारवाई करण्याचा निर्णय मुंबई महापालिकेने घेतला आहे.
छत्रपती संभाजीनगरचे शिवसेना जिल्हाप्रमुख तथा उपमहापौर राजेंद्र जंजाळ यांना सुपारी घेतल्याचा दावा करत 10 लाख रुपये मागितल्याची धमकी दिल्याचे त्यांनी सांगितले. याप्रकरणी पुंडलिकनगर पोलीस ठाण्यात तक्रार दाखल करण्यात आली. शिवसैनिकांनी ठाण्याबाहेर गर्दी करत कारवाईची मागणी केली. जंजाळ यांच्या तक्रारीवरून गुन्हा दाखल झाला असून, पोलीस पुढील तपास करत आहेत.
अमरावती जिल्ह्यातील तिवसा शहराचा मुख्य जलस्रोत असलेल्या वर्धा नदीच्या डोहाची पातळी 10 फुटांवर आली आहे. कमी पावसामुळे अधिग्रहित विहिरीही आटू लागल्या असून, 17 प्रभागांतील नागरिकांवर लवकरच पाणीटंचाईचे संकट ओढवण्याची शक्यता आहे.
