Maharashtra Weather Update: राज्यात मान्सूनचा प्रभाव ओसरल्यानंतर आता ‘ऑक्टोबर हिट’चा तीव्र तडाखा नागरिकांना बसू लागला आहे. एरव्ही या काळात हवेत गारवा निर्माण होण्यास सुरुवात होते, मात्र यंदा महाराष्ट्रातील वातावरणात अभूतपूर्व बदल पाहायला मिळत असून उष्णतेची लाट सदृश परिस्थिती निर्माण झाली आहे. हवामान विभागाने दिलेल्या ताज्या माहितीनुसार, 3 ऑक्टोबर रोजी कोकण किनारपट्टीसह राज्यातील बहुतांश भागांत तीव्र उकाडा आणि दमट हवामान राहण्याची शक्यता आहे. या पार्श्वभूमीवर हवामान खात्याकडून किनारपट्टीच्या भागांसाठी विशेष सतर्कतेचा इशारा (Yellow Alert) देण्यात आला आहे.
कोकणात उकाडा आणि दमट वातावरण
कोकणातील पालघर, ठाणे, मुंबई, रायगड, रत्नागिरी आणि सिंधुदुर्ग या सर्व 6 जिल्ह्यांमध्ये 3 ऑक्टोबर रोजी उष्ण तसेच अत्यंत दमट वातावरण राहणार असल्याचा अंदाज वर्तवण्यात आला आहे. मुंबई आणि आसपासच्या परिसरात कमाल तापमान 27 ते 35 अंश सेल्सिअस दरम्यान राहण्याची शक्यता आहे. अचानक वाढलेल्या या उकाड्यामुळे डिहायड्रेशन, चक्कर येणे आणि उष्माघातासारख्या आरोग्याच्या समस्या उद्भवू शकतात. त्यामुळे नागरिकांनी पुरेशा प्रमाणात पाणी प्यावे आणि दुपारच्या वेळी उन्हात जाणे टाळावे, असे आवाहन आरोग्य विभागाकडून करण्यात आले आहे.
पश्चिम महाराष्ट्र, मराठवाडा आणि विदर्भात कोरडे हवामान
दरम्यान, उत्तर महाराष्ट्रातील धुळे, नंदुरबार, जळगाव आणि नाशिकसह अहिल्यानगर जिल्ह्यात उन्हाची तीव्रता वाढणार आहे. नाशिकमध्ये तापमान 27 ते 35 अंश सेल्सिअस नोंदवले जाऊ शकते. पश्चिम महाराष्ट्रात पुणे शहर आणि आसपासच्या भागात तापमान 22 ते 35 अंश सेल्सिअस राहण्याची शक्यता असून हवामान कोरडे राहील.
हेही वाचा – ST प्रवाशांसाठी मोठी बातमी! पास काढण्याची पद्धत बदलली,जाणून घ्या नवी प्रक्रिया
याशिवाय, मराठवाड्यातील छत्रपती संभाजीनगर येथे पारा 37 अंशांपर्यंत जाण्याचा अंदाज आहे. विदर्भातील नागपूर, अकोला आणि अमरावती या भागांत कोणताही थेट इशारा नसला तरी तापमान सर्वाधिक 27 ते 38 अंश सेल्सिअस दरम्यान राहून तीव्र उकाडा जाणवेल.
