मुंबई: सध्या देशासह राज्यातील हवामानात मोठा 'अजब-गजब' लपंडाव पाहायला मिळत आहे. एकीकडे उत्तर भारतात कडाक्याच्या थंडीचा कडाका कायम असताना, महाराष्ट्रातून मात्र थंडी अक्षरशः गायब झाली आहे. गेल्या काही दिवसांपासून राज्याच्या वातावरणात सातत्याने चढ-उतार होत असून, नागरिकांना थंडी, पाऊस आणि उकाडा अशा तिन्ही ऋतूंचा एकाच वेळी अनुभव येत आहे. विशेषतः 1 जानेवारी 2026 रोजी झालेल्या पावसानंतर राज्यातील हवामानाचे गणित पूर्णपणे बिघडले असून, आता राज्यावर उष्णतेचे सावट गडद होत आहे.
धुळ्यात गारठा तर रत्नागिरीत उन्हाचे चटके
राज्याच्या तापमानात मोठी तफावत दिसून येत आहे. धुळ्यात 10.4 अंश सेल्सिअस इतक्या नीचांकी तापमानाची नोंद झाली असून येथे अद्याप काही प्रमाणात गारठा आहे. मात्र, याच्या अगदी उलट चित्र रत्नागिरीत पाहायला मिळत असून तिथे तापमानाचा पारा 34.8 अंश सेल्सिअसवर पोहोचला आहे. कोकण किनारपट्टीवर वाढलेल्या या उष्णतेमुळे आणि राज्यात आज दिवसभर राहणाऱ्या ढगाळ वातावरणामुळे 'उकाड्याची' शक्यता हवामान खात्याने वर्तवली आहे.
हेही वाचा: Mumbai Pune Expressway : मोठी बातमी! 32 तासांनंतर प्रवाशांनी घेतला सुटकेचा श्वास; मुंबई-पुणे महामार्गावरची वाहतूक पुन्हा सुरळीत
अनेक राज्यांना पावसाचा इशारा
भारतीय हवामान विभागाने (IMD) दिलेल्या इशाऱ्यानुसार, 5, 6 आणि 7 फेब्रुवारी रोजी देशातील अनेक राज्यांमध्ये मुसळधार पावसाची शक्यता आहे. यामध्ये प्रामुख्याने तामिळनाडू, हिमाचल प्रदेश, उत्तराखंड, अरुणाचल प्रदेश, छत्तीसगड आणि मध्य प्रदेशचा समावेश आहे. याशिवाय जम्मू-काश्मीर, लडाख आणि पुद्दुचेरी या भागातही पावसाचा अंदाज वर्तवण्यात आला आहे. केरळच्या समुद्रकिनारपट्टीजवळ कमी दाबाचा पट्टा निर्माण झाल्यामुळे दक्षिण भारतात पावसाचा जोर कायम आहे.
उत्तरेत कडाक्याची थंडी
राज्यात थंडी ओसरत असली तरी उत्तर भारतात अद्याप 'थंडीचा कडाका' कायम आहे. हरियाणातील हिस्सारमध्ये देशातील सर्वात कमी म्हणजेच 4.3 अंश सेल्सिअस तापमानाची नोंद करण्यात आली आहे. थंडीमुळे उत्तर भारतात जनजीवन विस्कळीत झाले असून त्याचा थेट परिणाम नागरिकांच्या आरोग्यावर होत आहे. डोंगरभागात होणाऱ्या बर्फवृष्टीमुळे आणि पश्चिमी विक्षोभामुळे (Western Disturbance) उत्तरेकडील पारा सातत्याने घसरत आहे.
प्रदूषणाचे संकट कायम
हवामानातील बदलासोबतच वायुप्रदूषण ही सर्वात मोठी समस्या बनली आहे. थंडी कमी झाली असली तरी मुंबई आणि दिल्लीतील हवेचा दर्जा (AQI) अत्यंत चिंताजनक स्तरावर आहे. मुंबईत आज सकाळी अनेक भागांत धुके आणि धूर यांचे मिश्रण पाहायला मिळाले. वाढलेल्या प्रदूषणामुळे श्वसनाचे विकार असणाऱ्या रुग्णांमध्ये वाढ होत असून, प्रशासनाकडून नागरिकांना खबरदारी घेण्याचे आवाहन करण्यात येत आहे.
हेही वाचा: India Vs South Africa T20: आधी बॅटने धोपटलं, मग बॉलिंगने रोखलं; आफ्रिकेला भारतीय खेळाडूंनी पाणी पाजलं, सराव सामन्यात नेमकं काय घडलं?