मुंबई: जानेवारी महिना म्हटलं की अंगाला झोंबणारा गारठा आणि बोचरी थंडी डोळ्यासमोर येते. मात्र, यंदा निसर्गाने आपले रंग बदलले असून महाराष्ट्रातील हवामानाचे गणित पूर्णपणे बिघडल्याचे चित्र दिसत आहे. आज 25 जानेवारी उजाडली, तरीही राज्याच्या अनेक भागांत थंडीऐवजी उकाडा आणि ढगाळ वातावरणाचे साम्राज्य आहे. उत्तर भारतात कडाक्याची थंडी असताना महाराष्ट्रात मात्र तापमानाचा पारा चढलेलाच असल्याने नागरिक बुचकळ्यात पडले आहेत.
निसर्गाची ही दोन टोकाची रूपे सध्या अनुभवायला मिळत आहेत. पंजाबमधील भटिंडा येथे उणे तापमानाची 0.8 अंश सेल्सिअस नोंद झाली असताना, महाराष्ट्रात मात्र थंडीचा पत्ता नाही. राज्यातील नीचांकी तापमान धुळ्यात 10.4 अंश सेल्सिअस इतके नोंदवले गेले असले, तरी निफाडमध्ये पारा 32.6 अंश सेल्सिअसच्या पुढे गेला आहे. सकाळी काहीसा गारठा जाणवत असला तरी दुपारी घामाच्या धारा वाहत आहेत, ज्यामुळे “कधी ऊन तर कधी थंडी” असा खेळ सुरू आहे.
हवामान तज्ज्ञांच्या मते, 1 जानेवारी रोजी झालेल्या अनपेक्षित पावसाने थंडीचे कंबरडे मोडले. मोसमी पाऊस जाऊन अनेक महिने उलटले तरी निसर्गाचे हे लहरीपण थांबायचे नाव घेत नाहीये. आज मराठवाड्यापासून ते विदर्भापर्यंत अनेक जिल्ह्यांमध्ये ढगाळ वातावरण राहण्याचा अंदाज आहे, तर काही ठिकाणी धुक्याची चादर पाहायला मिळू शकते. दिल्लीत किमान तापमान सहा अंश सेल्सिअसवर असताना जम्मू-काश्मीर आणि हरियाणामध्ये पावसाचा इशारा देण्यात आला आहे, ज्याचा परिणाम महाराष्ट्राच्या हवामानावरही होताना दिसत आहे.
हेही वाचा: WPL 2026: RCBचं थेट फायनलमध्ये जाण्याचं स्वप्न स्वप्नच राहणार? दिल्ली कॅपिटल्सचा जबरदस्त विजय, एलिमिनेटर फेरीची शर्यत पुन्हा रंगात
फक्त हवामानच नाही, तर वायू प्रदूषणानेही राज्याची चिंता वाढवली आहे. नवी मुंबईत हवेची गुणवत्ता ढासळल्याने प्रशासनाने संबंधित विभागांना नोटीस धाडली आहे. थंडीच्या कमतरतेमुळे आणि वाढत्या प्रदूषणामुळे नागरिकांमध्ये श्वसनाचे आजार बळावत आहेत. वातावरणातील या सततच्या बदलांमुळे आजारी लोकांची संख्या वाढत असून, विशेषतः लहान मुले आणि वृद्धांच्या आरोग्यावर याचा गंभीर परिणाम होत आहे.
पुढील 48 तास महत्त्वाचे
भारतीय हवामान विभागाच्या (IMD) ताज्या अंदाजानुसार, पुढील काही तास राज्यासाठी महत्त्वाचे आहेत. किमान तापमानात दोन ते तीन अंश सेल्सिअस वाढ होण्याची शक्यता असल्याने थंडी आणखी कमी होईल. एकीकडे उत्तर भारतात बर्फवृष्टी आणि पावसाचे सावट असताना, महाराष्ट्रात मात्र उकाडा सहन करावा लागणार आहे. निसर्गाचा हा ऋतू बदल पर्यावरणासाठी धोक्याची घंटा असल्याचे तज्ज्ञांचे म्हणणे आहे.
हेही वाचा: CJI Suryakant: 'न्याय उशिरा मिळणे म्हणजे अन्याय नव्हे, न्यायाचाच...'; सरन्यायाधीश सूर्यकांत यांचा गंभीर इशारा