सर्वसामान्यांना दिलासा मिळणार! कांद्याच्या वाढत्या किमती नियंत्रणात आणण्यासाठी मोदी सरकारचा मोठा निर्णय
Onion Price in India: हवामानातील बदल आणि एल निनोसारख्या नैसर्गिक संकटांमुळे शेतीचे मोठे नुकसान झाले असून, त्याचा थेट परिणाम फळे आणि भाजीपाल्याच्या बाजारावर झाला आहे. सध्या देशातील बाजारात कांद्याचे भाव गगनाला भिडले असून गेल्या वर्षीच्या तुलनेत कांद्याचे दर थेट दुप्पट झाले आहेत. सरकारी आकडेवारीनुसार 10 ऑक्टोबर रोजी देशात कांद्याचा सरासरी किरकोळ भाव 52.99 रुपये प्रति किलो इतका नोंदवला गेला, तर गेल्या वर्षी याच कालावधीत हा दर 26.65 रुपये प्रति किलो होता. एका वर्षात कांद्याच्या किंमतीत तब्बल 99 टक्क्यांनी वाढ झाल्यामुळे सर्वसामान्यांचे बजेट पूर्णपणे कोलमडले आहे.
घाऊक आणि किरकोळ बाजारातील स्थिती; कांद्याचा पुरवठा विसकळीत
एका वृत्तानुसार, 10 सप्टेंबर रोजी कांद्याचा सरासरी किरकोळ भाव 53.10 रुपये प्रति किलो होता, जो 10 ऑक्टोबर रोजी किंचित घसरून 52.99 रुपयांपर्यंत खाली आला आहे. किरकोळ बाजारात दर अद्याप म्हणावे तसे कमी झालेले नसले तरी, घाऊक बाजारात कांद्याचा सरासरी भाव सध्या 4,591 रुपये प्रति क्विंटल इतका आहे. मागील महिन्याच्या तुलनेत हा भाव 2.4 टक्क्यांनी जास्त असून, गेल्या वर्षभराच्या तुलनेत घाऊक दर तब्बल 123.3 टक्क्यांनी वधारले आहेत. यामुळे घाऊक बाजारावरील ताण कमी करण्यासाठी प्रभावी पावलांची गरज निर्माण झाली होती.
हेही वाचा – महागाईचा सर्वसामान्यांना मोठा दणका! खाद्यपदार्थांच्या दरांमध्ये वाढ; किरकोळ महागाई 5.54 टक्क्यांवर
कांद्याचे भाव खाली आणण्यासाठी सरकारची मोठी कारवाई; बफर स्टॉकची विक्री सुरू
सामान्यांना या महागाईतून मोठा दिलासा देण्यासाठी केंद्र सरकारने अखेर ठोस पावले उचलण्यास सुरुवात केली आहे. सरकारच्या वतीने आता आपल्या अधिकृत बफर स्टॉकधून कांद्याची बाजारात विक्री केली जात आहे. हा सरकारी कांदा मोठ्या प्रमाणात बाजारात उपलब्ध झाल्यानंतर कांद्याचे दर वेगाने कमी होण्यास मदत होईल, अशी दाट शक्यता वर्तवली जात आहे. आवक वाढल्यामुळे बाजारातील कृत्रिम ताण कमी होणार असून ग्राहकांना स्वस्त दरात कांदा उपलब्ध होण्याचा मार्ग मोकळा झाला आहे.
महाराष्ट्रासह दक्षिण भारतातून कांद्याची नवीन आवक वाढणार
महाराष्ट्रात कांद्याचे उत्पादन मोठ्या प्रमाणावर घेतले जात असून, राज्याच्या विविध भागांतून खरीप हंगामातील नवीन कांदा लवकरच बाजारात दाखल होण्यास सुरुवात होणार आहे. याशिवाय कर्नाटक, तेलंगणा आणि आंध्र प्रदेश या राज्यांमधूनही नोव्हेंबर महिन्याच्या शेवटपर्यंत मोठ्या प्रमाणावर कांदा बाजारात पोहोचण्याची शक्यता आहे. देशातील कांद्याचे भाव नियंत्रणात आणण्यात महाराष्ट्र राज्य अत्यंत महत्त्वाची भूमिका बजावणार असून, येत्या काळात आवक वाढण्यामुळे कांद्याचे दर वेगाने खाली येतील असा विश्वास व्यक्त केला जात आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.