‘मृत्युपत्र’ आणि मालमत्ता करारांची नोंद आता घरबसल्या मिळकतपत्रिकेवर होणार; भूमी अभिलेख विभागाची ‘इप्सित’ पोर्टलवर नवी सुविधा

ePSIT Portal Property Card Online: राज्यातील नागरी आणि शहरी भागातील नागरिकांना आता त्यांच्या मृत्युपत्राची (इच्छापत्र) नोंद मिळकतपत्रिकेवर (प्रॉपर्टी कार्ड) घेण्यासाठी नगर भूमापन (सिटी सर्व्हे) कार्यालयात हेलपाटे मारण्याची अजिबात गरज उरणार नाही. भूमी अभिलेख विभागाने नागरिकांच्या सोयीसाठी ‘इप्सित’ या अधिकृत पोर्टलवर ही विशेष ऑनलाईन सुविधा उपलब्ध करून दिली आहे. मृत्युपत्राव्यतिरिक्त भाडेपट्टा, हस्तांतरण करार, रद्द करार, दुरुस्ती पत्र आणि कन्फर्मेशन डीड यांसारख्या विविध कायदेशीर करारांच्या नोंदी देखील आता अत्यंत सुलभ रीतीने घरबसल्या ऑनलाईन करता येणार आहेत. प्रणाली अधिक पारदर्शक आणि वेगवान करण्यासाठी सर्व्हरचे अत्याधुनिक तंत्रज्ञानासह अद्ययावतीकरण करण्यात आले आहे.

‘आय-सरिता’ आणि ‘बीपीएमएस’ एकत्रीकरणामुळे बनावट खरेदी-विक्रीला चाप
यापूर्वी नागरिकांना घर, जमीन किंवा सदनिकेची दस्तनोंदणी (Document Registration) करताना प्रत्यक्ष मिळकतपत्रिका सादर करावी लागत असे. मात्र, आता भूमी अभिलेख विभागाने आपली मिळकतपत्रिका प्रणाली नोंदणी व मुद्रांक विभागाच्या ‘आय-सरिता’ प्रणालीशी ‘एपीआय’द्वारे (API) थेट जोडली आहे. या एकत्रीकरणामुळे नोंदणी कार्यालयात संगणकावरच अधिकृत मिळकतपत्रिका आपोआप उपलब्ध होत आहे. बनावट किंवा फेरफार केलेली कागदपत्रे सादर करून केली जाणारी जमीन व घरांची फसवणूक आता पूर्णपणे रोखली गेली आहे. याशिवाय, ‘बीपीएमएस’ (BPMS) प्रणालीसोबतही ही यंत्रणा थेट जोडण्यात आली आहे.

प्रणालीतील मॉड्यूल्स 6 वरून थेट 14 वर; तांत्रिक अडचणी दूर
नगर भूमापन कार्यालयांच्या कामकाजात पूर्वी केवळ 6 मॉड्यूल्स उपलब्ध असल्यामुळे अनेक महत्त्वाच्या कायदेशीर व्यवहारांच्या नोंदी मिळकतपत्रिकेवर घेण्यात तांत्रिक अडथळे येत होते. ही समस्या सोडवण्यासाठी मॉड्यूल्सची संख्या वाढवून आता 14 करण्यात आली आहे. यामध्ये वारस हक्क नोंद, मृत्युपत्र व इच्छापत्र नोंद, हस्तांतरण करार, भाडेपट्टा नोंद, दुरुस्ती पत्र (चूक दुरुस्ती), कन्फर्मेशन डीड आणि सप्‍लिमेंटरी डीड ऑफ डिक्लेरेशन यांसारख्या महत्त्वाच्या सेवांचा समावेश करण्यात आला आहे. यामुळे कायदेशीर नोंदींची प्रक्रिया अधिक सुलभ झाली आहे.

हेही वाचा – दसरा की दिवाळी? लाडकी बहिणींच्या खात्यात 1500 येणार की 3,000? सणासुदीच्या तोंडावर मोठी अपडेट समोर

डेटाबेसचे अद्ययावतीकरण; न्यायालयीन आदेशाचा फेरफार आता एकाच दिवसात
भूमी अभिलेख विभागाच्या ‘इलेक्ट्रॉनिक प्रॉपर्टी कार्ड इन्फॉर्मेशन सिस्टीम’चे डेटाबेस व्हर्जन सुरक्षित डेटा मायग्रेशनद्वारे अद्ययावत करण्यात आले आहे, ज्यासाठी सलग 72 तास तांत्रिक प्रक्रिया राबवण्यात आली. या अद्ययावतीकरणामुळे सर्व्हरचा वेग आणि साठवणूक क्षमता लक्षणीयरीत्या वाढली आहे. तसेच, न्यायालयीन किंवा सक्षम प्राधिकरणाच्या आदेशानंतर मिळकतपत्रिकेवर फेरफार नोंद घेण्यासाठी पूर्वी लागणारा 15 दिवसांचा प्रतीक्षा कालावधी आता संपला आहे. अपील कालावधी संपलेल्या न्यायालयीन आदेशांची नोंद आता अवघ्या 1 दिवसात स्वयंचलित (Automated) पद्धतीने पूर्ण केली जात आहे.

अर्बन सिटी सर्व्हे सर्व्हर अद्ययावत; गतिमान सेवेचा जमाबंदी आयुक्तांचा दावा
जमाबंदी आयुक्त तथा भूमी अभिलेख संचालक शैलेश नवाल यांनी दिलेल्या माहितीनुसार, राज्यातील सर्व महानगरपालिका, नगरपालिका आणि नगर भूमापन क्षेत्रातील नागरिकांना वेगवान व विनाअडथळा सेवा पुरवण्यासाठी अर्बन सिटी सर्व्हेचे सर्व्हर पूर्णपणे अपडेट करण्यात आले आहे. नागरिकांना आता ऑनलाईन मिळकतपत्रिका पाहणे, डाऊनलोड करणे आणि फेरफारासाठी अर्ज सादर करणे अत्यंत सोपे झाले आहे. भूमी अभिलेख विभागाच्या या क्रांतिकारी निर्णयामुळे नागरिकांचा वेळ आणि पैसा दोन्ही वाचणार आहेत.

हेही वाचा – ऐन दिवाळीत विमान प्रवाशांना मोठा धक्का! इंडिगोची उड्डाणे रद्द; पूर्ण वेळापत्रक आले समोर