Ranjitsinh Naik Nimbalkar: फलटण महिला डॉक्टर आत्महत्या प्रकरणाने राज्याच्या राजकारणात तणावाचे नवीन वळण निर्माण केले आहे. शिवसेना (उद्धव बाळासाहेब ठाकरे गट) नेत्या सुषमा अंधारे यांनी केलेल्या गंभीर आरोपांनंतर भाजपचे माजी खासदार रणजितसिंह नाईक निंबाळकर यांनी सोमवारी पत्रकार परिषद घेत आपली बाजू मांडली. या प्रकरणात आपलं नाव गुंतवलं जात असल्याचं त्यांनी सांगितलं आणि संपूर्ण आरोपांना उत्तर देताना ते क्षणोक्षणी भावूक झाले. ‘मी कुणापासूनही पळत नाही. तुम्ही हवं तर माझा नार्को टेस्ट करा. मला यात काहीही लपवायचं नाही,’ असा ठाम दावा निंबाळकर यांनी केला. एवढंच नाही तर ज्यांनी आरोप केले आहेत त्यांनीसुद्धा नार्को टेस्ट करावी, आणि त्या टेस्टचा खर्च स्वतः देण्याची घोषणाही त्यांनी केली.
पत्रकार परिषदेत त्यांनी स्क्रीन प्रेझेंटेशनद्वारे काही पत्रांचा संदर्भ दिला. त्यात पेट्रोल चोरीसंबंधी उल्लेख असल्याचं त्यांनी दाखवलं. त्यांनी असा सूर लावला की, सोशल मिडियावर आणि राजकीय व्यासपीठांवर त्यांच्या विरुद्ध जे काही प्रसारित झालं त्यात व्यवस्थित पारख न करता त्यांना गुन्हेगार ठरवण्याचा प्रयत्न केला गेला. त्यांच्या मते हे सगळं एखाद्या ‘मास्टरमाइंड’ ने एकत्रितपणे आखलेलं प्लॅनिंग आहे. कुठेतरी आतूनच आपली प्रतिमा खराब करण्याचा प्रयत्न केला जात आहे, असं तेदेखील म्हणाले. मात्र, त्यांनी सुषमा अंधारे यांच्या वैयक्तिक हेतूवर बोट न ठेवता 'त्या फक्त त्यांनी मिळालेली माहिती सांगत आहेत' असं म्हणून त्यांना थेट जबाबदार धरलं नाही.
तणावपूर्ण प्रेस कॉन्फरन्स संपली, आणि त्यानंतरचे दृश्य क्षणभरात चर्चेचा विषय झाले. निंबाळकर भावूक झाले, डोळ्यातून अश्रू धारा वाहू लागल्या. समर्थकांनी त्यांचा जलाभिषेक केल्याचे दृश्यही व्हायरल झाले. यावरून या प्रकरणाची संवेदनशीलता किती वाढली आहे याचा अंदाज येतो.
दरम्यान, या प्रकरणावरून राजकीय वर्तुळातही वाद सुरू आहे. आरोप-प्रत्यारोपांच्या रणधुमाळीत आता नार्को टेस्टचा मुद्दा निनादू लागला आहे. आरोप सिद्ध होतील की नाव स्वच्छ होईल याबाबत उत्सुकता वाढली आहे. महत्वाचं म्हणजे या प्रकरणाला आता केवळ राजकीय तोंड नाही, तर जनभावनेचीही जोड मिळू लागली आहे.
यानंतर तपास यंत्रणा या दिशेने पाऊल टाकणार का? नार्को टेस्टची मागणी मंजूर होणार का? सगळ्यांच्या नजरा आता पुढील निर्णयाकडे लागल्या आहेत. या प्रकरणातील पुढील पायऱ्या राजकारणातील समीकरणं आणि वातावरण दोन्हीवर स्पष्ट परिणाम करणार हे निश्चित.
