Sunetra Pawar: मराठवाडा आणि विदर्भात तीव्र दुष्काळाची भीषणता वाढत असताना राज्य सरकारच्या प्रतिनिधींचे पाहणी दौरे गतीने सुरू झाले आहेत. मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या दौऱ्यांनंतर, आता उपमुख्यमंत्री सुनेत्रा पवार यांनी नांदेड जिल्ह्यातील लोहा तालुक्यातील सोनखेड शिवारात थेट शेतकऱ्यांच्या बांधावर जाऊन पिकांच्या नुकसानीची पाहणी केली. पाहणीदरम्यान स्थानिक शेतकरी बांधवांनी कोरड्या पडलेल्या पिकांची अवस्था दाखवत पिण्याच्या पाण्याची टंचाई, गुरांच्या चाऱ्याची समस्या आणि मुलांच्या शिक्षणाचा उभा ठाकलेला खर्च याबद्दल आपल्या व्यथा मांडल्या. याप्रसंगी सुनेत्रा पवार यांनी अतिशय आपुलकीने सर्व अडचणी ऐकून घेत, “मी स्वतः एक शेतकरी असून मराठवाड्याची लेक आहे, त्यामुळे तुमच्या वेदनांची मला पूर्ण जाणीव आहे,” असे म्हणत बळीराजाला दिलासा दिला.
‘दादां’च्या कार्यशैलीची झलक; प्रशासकीय दिरंगाई बाजूला सारून थेट उपायांवर भर
संवादादरम्यान एका भावूक शेतकऱ्याने अजितदादांच्या धडाडीच्या निर्णयक्षमतेची आठवण करून दिली. त्याला तात्काळ उत्तर देताना सुनेत्रा पवार म्हणाल्या की, “दादांवर तुमचे किती मनापासून प्रेम आहे याची आम्हाला पूर्ण जाणीव आहे. आम्ही सर्वजण तुमच्यासोबत खंबीरपणे उभे आहोत आणि काही दिवसांतच प्रशासनाचा कार्यवेग तुम्हाला अनुभवायला मिळेल.” केवळ कागदी नियमांचे कारण न सांगता जनावरांचा चारा आणि पिण्याच्या पाण्याचा प्रश्न प्राधान्याने सोडवला जाईल, तसेच मुलांच्या शिक्षणाच्या खर्चाबाबतही शासन योग्य ते धोरण आखेल, अशी ग्वाही त्यांनी दिली. त्यांच्या या थेट संवादात अजित पवारांच्या कार्यपद्धतीची स्पष्ट झलक पाहायला मिळाली.
पंचनाम्यांचे अहवाल अन् तातडीच्या मदतकार्याला गती देण्याचे प्रशासनाला निर्देश
शेतकऱ्यांशी सविस्तर चर्चा केल्यानंतर उपमुख्यमंत्र्यांनी उपस्थित प्रशासकीय अधिकाऱ्यांना नुकसानीचे अचूक पंचनामे जलद गतीने पूर्ण करण्याचे निर्देश दिले. दुष्काळाच्या या कठीण प्रसंगात कोणतीही तांत्रिक अडसर न आणता प्रत्येक बाधित कुटुंबापर्यंत शासकीय मदत पोहोचवली जाईल, असा विश्वास त्यांनी व्यक्त केला. राज्य सरकार या बिकट प्रसंगात पूर्ण क्षमतेने शेतकऱ्यांच्या पाठीशी उभे राहील, असा पुनरुच्चार त्यांनी केला.
