मुंबई: ट्रोल करणाऱ्यावर बोलताना आमदार बबनराव लोणीकर यांची जीभ घसरली आहे. यावरुन विरोधक आक्रमक झाले आहेत. ही ब्रिटिशांची देशी आवृत्ती आहे. तसेच लोकशाहीत ही भाषा बरी नव्हे अशी टीका ठाकरे गटाचे नेते अंबादास दानवे यांनी केली आहे.
जालन्याचे आमदार बबनराव लोणीकर यांनी एका कार्यक्रमात ट्रोल करणाऱ्यांवर भाष्य केले आहे. यावेळी तुझ्या बापाला पेरणीसाठी सहा हजार लोणीकरनं दिले. तुझ्या अंगावरचे कपडे आणि चप्पल आमच्या सरकारची असल्याचे त्यांनी म्हटले आहे. यावर अंबादास दानवे यांनी टीका केली आहे. लोकशाहीत लोणीकरांची भाषा बरी नसल्याचे दानवे यांनी म्हटले आहे. यासंदर्भात दानवे यांनी एक्स पोस्ट केली आहे.
हेही वाचा : तुझ्या बापाला पेरणीसाठी 6 हजार लोणीकरनं दिले; लोणीकरांची जीभ घसरली
अंबादास दानवेंची पोस्ट
ही ब्रिटिशांची देशी आवृत्ती! लोकशाहीत ही भाषा बरी नव्हे बबनराव. कारण..
तुमचे कपडे,बूट या जनतेमुळे.. आमदारकी जनतेमुळे.. तुमच्या गाडीतील डिझेल जनतेमुळे.. तुमचे विमानाचे तिकीट जनतेमुळे.. नेतेगिरी जनतेमुळे.. विधानसभेतील स्थान जनतेमुळे.. यांचे हे बोल लक्षात ठेवा. निवडणूक येते आहे असे म्हणत ठाकरे गटाच्या दानवे यांनी आमदार बबनराव लोणीकर यांची कान उघडणी केली आहे.
काय म्हणाले लोणीकर?
नरेंद्र मोदीजींचे आणि देवेंद्र फडणवीसांचे अंध:भक्त म्हणणारे कुचरवट्यावर बसणारे कार्टे आहेत असं वक्तव्य जालना जिल्ह्यातील भाजपा आमदार बबनराव लोणीकर यांनी केलंय. परतूर तालुक्यातील वाटूर येथे हर घर सोलार योजनेचं लोणीकरांच्या हस्ते शुभारंभ करण्यात आला. त्यावेळी ते बोलत होते. काही तरुण कुचरवट्यावर बसतात आणि हे आमदाराच्या दावणीला बांधलेले आहेत असं लिहितात. गावात विकासाची कामं केली, विविध योजनेतून पगार सुरु केले, पेन्शन योजना आणली. मात्र कुचरवट्यावर बसणारे कार्टे लिहितात की हे देवेंद्र फडणवीसांचे, नरेंद्र मोदीजींचे अंध: भक्त आहेत. पण तुझ्या गावात पंचवीस वर्षात जे दिलं ते बबनराव लोणीकरांनीच दिलं. कुचरवट्यावर बरणाऱ्या कार्टाच्या आईचा पगार बबनराव लोणीकर करतो, तुझ्या बापाला पेरणीला सहा हजार रुपये बबनराव लोणीकराने दिले, तुझ्या अंगावरले कपडे आणि चप्पल आमच्या सरकारची आहे असं लोणीकर यांनी म्हंटलं आहे.