सातारा: साताऱ्यातील महिला डॉक्टरच्या आत्महत्येनंतर अनेक मोठे खुलासे होत आहेत. आत्महत्या प्रकरणात आत्तापर्यंत झालेल्या तपासात अनेक महत्त्वाची माहिती समोर आली आहे. बलात्कार आणि आत्महत्येस प्रवृत्त केल्याप्रकरणी फलटण ग्रामीण पोलीस ठाण्याचे अधिकारी गोपाळ बदने आणि महिलेचे घर मालक प्रशांत बनकर यांच्यावर गुन्हा दाखल केला आहे. दोघे जण फरार असून पोलिसांच्या दोन पथकांकडून शोध सुरू आहे. तर त्यांच्या कुटुंबीयांचे जबाब नोंदवण्याची प्रक्रिया सुरू आहे.
महिला डॉक्टर आत्महत्या प्रकरणी तपासातील इतर महत्त्वाचे मुद्दे समोर आले आहेत. गेल्या आठ महिन्यांपासून महिला डॉक्टर या बनकर यांच्या घरात भाडेकरू म्हणून राहत होत्या. 23 तारखेला पहाटे 1.30 वाजता डॉक्टर महिलेने फलटण येथील हॉटेल मधूदीप मध्ये "चेक इन"केलं . तसेच त्यांनी हॉटेलची रूम दोन दिवसांसाठी बुक केली. प्राथमिक तपासात हॉटेल मधुदीप येथे जात असताना महिला डॉक्टरसोबत कोणी नव्हतं.
दिवसभरात दार न उघडल्यामुळे संशय आल्यामुळे 23 तारखेला संध्याकाळी 4 वाजता हॉटेल व्यवस्थापनाने दार उघडले. पोलिसांनी हाताची मूठ उघडल्यानंतर हातावर लिहिलेला मजकूर समोर आला. पोस्ट मॉर्टम रिपोर्टमध्ये डॉक्टर महिलेचा मृत्यू हा गळफास घेतल्यामुळे झाला असल्याचे समोर आले. मृत्यूपूर्वी कुठल्याही जखमा किंवा व्रण शरीरावर नसल्याचे स्पष्ट झाले आहे.
हेही वाचा: Satara News: हातावर नोट लिहित महिला डॉक्टरने संपवलं जीवन, साताऱ्यातील धक्कादायक घटना
प्रशांत बनकर हा महिला डॉक्टर भाड्याने राहत असलेल्या घरमालकाचा मुलगा असल्याचे सांगितले जात आहे. गोपाल बदने याने केलेल्या लैंगिक अत्याचारामुळे आत्महत्या केल्याचे त्यांच्या सुसाइड नोटमुळे समोर आले आहे. तर मदने हा फलटण ग्रामीण पोलीस दलात कार्यरत होता. प्रशांत बनकर याने मानसिक त्रास दिल्याचेही त्यांनी नमूद केले आहे. महिला डॉक्टर आणि प्रशांत बनकर यांच्यात जानेवारी महिन्यापासून 157 पेक्षा अधिक कॉल झाल्याचे समोर आले आहे.आत्महत्यापूर्वी महिला डॉक्टर आणि प्रशांत बनकर यांच्यात फोन कॉल झाले आहेत. मूळच्या बीडच्या असलेल्या महिला डॉक्टर या बनकर यांच्या घरी भाडेकरू म्हणून 8 महिन्यापासून राहत होत्या. महत्त्वाचे म्हणजे व्हॉट्सॲप कॉल डिलिट केल्यामुळे डॉक्टर यांच्या मोबाईलमधील मेसेज पुन्हा मिळवण्याची प्रक्रिया सायबर तज्ञांकडून केली जात आहे.
डॉक्टर तरुणीचे वडील हे शेतकरी आहेत. महिला डॉक्टर कुटुंबातली सर्वात मोठी मुलगी होती. जळगावच्या मेडिकल कॉलेजमधून तीने एमबीबीएस केलं.एमबीबीएसनंतर महाबळेश्वरला 6 महिने सेवा दिली. त्यानंतर गेल्या वर्षभरापासून फलटणच्या उपजिल्हा रुग्णालयामध्ये कार्यरत होती. दरम्यान याप्रकरणी पोलिसांनी गोपाळ बदनेला सेवेतून निलंबित केलं आहे.