Devendra Fadnavis : ‘भेसळखोरांना सोडणार नाही…’; तुकाराम मुंढेंच्या कामगिरीचं देवेंद्र फडणवीसांकडून कौतुक

Devendra Fadnavis : महाराष्ट्रातील अन्न व औषध प्रशासन विभागाची (FDA) सूत्रे हाती घेतल्यापासून वरिष्ठ आयएएस अधिकारी तुकाराम मुंढे यांनी राज्यभरात भेसळयुक्त अन्नपदार्थ, दूषित दुग्धजन्य उत्पादने आणि अस्वच्छ उपाहारगृहांवर धडक धाडी टाकण्याचा धडाका लावला आहे. दररोज चालणाऱ्या या धाडसत्रामुळे खाद्यपदार्थांमध्ये होणाऱ्या काळ्याबाजाराला मोठा लगाम बसला आहे. या धडक मोहिमेची दखल घेत महाराष्ट्राचे मुख्यमंत्री देवेंद्र फडणवीस यांनी अन्न व औषध प्रशासनाच्या कामगिरीचे खुलेपणाने कौतुक केले आहे. नागरिकांच्या जीवाशी खेळणाऱ्या भेसळखोरांविरोधात अशीच कठोर आणि निर्भय कारवाई यापुढेही सुरू राहील, असा विश्वास त्यांनी व्यक्त केला आहे.

हेही वाचा – Dr. Narendra Dabholkar Case : डॉ. नरेंद्र दाभोलकर हत्याप्रकरणात मुख्य आरोपी अंदुरेला जामीन मंजूर, जन्मठेपेच्या शिक्षेवर कोर्टाचा मोठा निर्णय

‘मकोका’ अन् कठोर कायदेशीर कारवाईचे उपमुख्यमंत्र्यांचे आदेश

दुसरीकडे, सह्याद्री अतिथीगृहावर झालेल्या उच्चस्तरीय बैठकीत उपमुख्यमंत्री एकनाथ शिंदे यांनी एफडीएचे आयुक्त तुकाराम मुंढे यांच्याकडून सध्या सुरू असलेल्या मोहिमेचा सविस्तर आढावा घेतला. या वेळी बोलताना उपमुख्यमंत्र्यांनी स्पष्ट निर्देश दिले की, दूध, पनीर आणि इतर खाद्यपदार्थांमध्ये भेसळ करून जनतेच्या आरोग्याशी प्रतारणा करणाऱ्या गुन्हेगारांवर थेट ‘मकोका’ (MCOCA) सारख्या कठोर आणि अजामीनपात्र कायद्यांतर्गत गुन्हे दाखल करण्यात यावेत. न्यायालयीन प्रक्रियेत कोणतेही तांत्रिक दोष राहू नयेत यासाठी तज्ज्ञ वकिलांचे विशेष कायदेशीर पथक स्थापन करण्याची सूचनाही त्यांनी प्रशासनाला दिली.

? 12.16pm | 18-8-2026?Mumbai. LIVE | Media Interaction#Maharashtra #Mumbaihttps://t.co/xP0sPrRYw4 — Devendra Fadnavis (@Dev_Fadnavis) August 18, 2026

केवळ उपाहारगृहे किंवा दुकानांवरच नव्हे, तर दिशाभूल करणाऱ्या जाहिरातींवरही एफडीएने आपला मोर्चा वळवला आहे. ‘विमल इलायची’च्या नावाखाली अप्रत्यक्षपणे (सरोगेट ॲडव्हर्टायझिंग) पान मसाल्याचा प्रचार केल्याप्रकरणी एफडीएने बॉलिवूडचे दिग्गज अभिनेते शाहरुख खान, अजय देवगण आणि टायगर श्रॉफ यांना ‘कारणे दाखवा नोटीस’ जारी केली आहे. बंदी घातलेल्या उत्पादनांची अप्रत्यक्ष प्रसिद्धी करणे हा अन्न सुरक्षा कायद्याचा भंग मानला जात असल्याने, या कलाकारांना 15 दिवसांत लेखी स्पष्टीकरण सादर करण्याचे निर्देश मुंढे यांच्या प्रशासनाने दिले आहेत. या कारवाईमुळे प्रशासनाचा आणि सरकारचा भेसळमुक्त महाराष्ट्र घडवण्याचा संकल्प अधिक दृढ झाल्याचे स्पष्ट दिसत असून, संपूर्ण राज्यभरात एफडीएच्या या धडक कारवायांचे जोरदार स्वागत केले जात आहे.