रुपयाची घसरण रोखण्यासाठी RBI ॲक्शन मोडमध्ये; तेल कंपन्यांसाठी ‘स्पेशल डॉलर विंडो’ सुरू
मुंबई: डॉलरच्या तुलनेत सातत्याने घसरत असलेल्या रुपयाला सावरण्यासाठी रिझर्व्ह बँक ऑफ इंडिया (RBI) ने मोठा निर्णय घेतला आहे. रुपयावरील दबाव कमी करण्यासाठी RBI ने दोन महत्त्वाची पावले उचलली आहेत.
- तेल कंपन्यांसाठी स्पेशल विंडो: सरकारी तेल कंपन्यांच्या डॉलरच्या गरजा पूर्ण करण्यासाठी RBI ने थेट ‘स्पेशल डॉलर विंडो’ सुरू केली आहे. यामुळे तेल कंपन्यांना डॉलरसाठी खुल्या बाजारात जावे लागणार नाही आणि स्पॉट मार्केटवरील डॉलरच्या मागणीचा दबाव कमी होईल. भारताच्या एकूण आयातीत कच्च्या तेलाचा वाटा सुमारे 25% आहे.
- फॉरेक्स नियम कडक: याशिवाय RBI ने फॉरेक्स डेरिव्हेटिव्ह ट्रेडिंगचे नियमही अधिक कडक केले आहेत. कोणत्याही ठोस व्यवहाराशी संबंध नसलेल्या सट्टेबाजीच्या व्यवहारांना आळा घालण्यासाठी हा निर्णय घेण्यात आला आहे.
हेही वाचा – प्रतीक्षा संपणार! पनवेल-कर्जत लोकलच्या शुभारंभाबाबत मोठी अपडेट; डब्यांची संख्याही समोर
रुपया 7% घसरला
2026 या वर्षात आतापर्यंत रुपया 7% पेक्षा जास्त घसरला आहे. शुक्रवारी रुपया 96.73 वर बंद झाला होता, जो त्याच्या 96.96 या सार्वकालिक नीचांकी पातळीच्या अगदी जवळ आहे. कच्च्या तेलाच्या वाढत्या किमती आणि परकीय गुंतवणूक कमी झाल्याने रुपयावर दबाव आहे. RBI ला रुपया 97 च्या पुढे जाऊ द्यायचा नाही. 96.80 च्या वर गेल्यावर RBI सरकारी बँकांमार्फत डॉलरची विक्री करत आहे.
तज्ज्ञांच्या मते, RBI च्या या निर्णयामुळे रुपयाला तात्पुरता दिलासा मिळेल, मात्र जागतिक बाजारातील स्थितीमुळे मध्यम मुदतीत रुपयावरील दबाव कायम राहू शकतो.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.