Stock Market Crash: गुरुवारी भारतीय शेअर बाजारात मोठ्या प्रमाणावर विक्रीचा दबाव दिसून आला. बाजारावर सुरुवातीपासूनच मंदीचे सावट होते आणि जसजसे कामकाज पुढे सरकले, तसतशी ही घसरण अधिक तीव्र आणि व्यापक होत गेली. या सत्रात सेन्सेक्स 1,200 हून अधिक अंकांनी घसरला, तर निफ्टी 23,100 च्या पातळीच्या खाली येऊन बंद झाला. विशेष म्हणजे, बाजारातील ही घसरण केवळ एका विशिष्ट क्षेत्रापुरती मर्यादित नसून जवळपास सर्वच प्रमुख क्षेत्रांचे निर्देशांक घसरणीसह लाल रंगात बंद झाले आहेत.
क्षेत्रीय निर्देशकांमध्ये व्यापक घसरण आणि प्रमुख शेअर्सची स्थिती
24 सप्टेंबर रोजी व्यवहाराच्या अखेरीस, सेन्सेक्स 1,247.71 अंकांनी म्हणजेच 1.67 टक्क्यांनी घसरून 73,580.54 वर बंद झाला. त्याच वेळी, निफ्टी 383.70 अंकांनी म्हणजेच 1.64 टक्क्यांनी घसरून 23,063.10 च्या पातळीवर स्थिरावला. संपूर्ण बाजारात सुमारे 1,400 शेअर्समध्ये वाढ नोंदवली गेली, तर तब्बल 2,772 शेअर्समध्ये घसरण पाहायला मिळाली. निफ्टीमध्ये सर्वाधिक घसरण झालेल्या प्रमुख कंपन्यांमध्ये बजाज फायनान्स, एचडीएफसी लाईफ, बजाज फिनसर्व्ह, ॲक्सिस बँक आणि इंटरग्लोब एव्हिएशन यांचा समावेश होता.
याउलट, प्रतिकूल बाजारस्थितीतही सिप्ला आणि एनटीपीसीच्या शेअर्सने किंचित वाढ नोंदवत सावरण्याचा प्रयत्न केला. विक्रीचा दबाव इतका प्रचंड होता की सर्वच क्षेत्रीय निर्देशांक घसरले; ज्यामध्ये निफ्टी प्रायव्हेट बँक 2.2 टक्के, मेटल 1.9 टक्के आणि बँक निर्देशांक 1.7 टक्क्यांनी घसरले. ऑटो आणि इन्फ्रा क्षेत्रात 1.5 टक्क्यांची, तर ऑइल अँड गॅस क्षेत्रात 1.3 टक्क्यांची घसरण नोंदवली गेली.
बाजारातील या मोठ्या पडझडीमागील प्रमुख कारणे
अमेरिकेतील बॉन्ड यील्डमधील वाढती चिंता
बाजारातील या तीव्र घसरणीचे एक मुख्य कारण म्हणजे अमेरिकेतील बॉन्ड यील्डमध्ये झालेली मोठी वाढ होय. अमेरिकेच्या 10-वर्षीय ट्रेझरी यील्डने 2007 नंतरची सर्वोच्च पातळी गाठली आहे, तर 2-वर्षीय ट्रेझरी यील्डने 4.9 टक्क्यांची पातळी ओलांडली आहे. यामुळे गुंतवणूकदारांसाठी सुरक्षित गुंतवणुकीचे पर्याय अधिक आकर्षक ठरल्याने अनेकांनी इक्विटीमधून आपला पैसा काढून डेट इन्स्ट्रुमेंट्समध्ये वळवला, ज्यामुळे शेअर बाजारावर प्रचंड विक्रीचा दबाव निर्माण झाला.
‘फेड’च्या धोरणाबाबत अनिश्चितता
अमेरिकेची आर्थिक आकडेवारी अपेक्षेपेक्षा अधिक भक्कम आल्यामुळे, अमेरिकन फेडरल रिझर्व्ह व्याजदरांबाबत अधिक कठोर भूमिका घेऊ शकते, अशी भीती बाजारात निर्माण झाली आहे. या जागतिक घडामोडींचा थेट नकारात्मक परिणाम भारतीय शेअर बाजारावरही झाल्याचे दिसून आले.
हेही वाचा – RBI FD New Rules: बँक ग्राहकांची फसवणूक थांबणार; FD दरांबाबत RBI चे 3 महत्त्वपूर्ण निर्णय
कच्च्या तेलाच्या वाढत्या किमती
याशिवाय, कच्च्या तेलाच्या आंतरराष्ट्रीय किंमतीत झालेली वाढ बाजारातील चिंतेत भर घालणारी ठरली. तेलाच्या किमती पुन्हा एकदा प्रति बॅरल 102 डॉलर्सच्या वर गेल्या आहेत. अमेरिका आणि इराण यांच्यातील वाढता तणाव तसेच ‘स्ट्रेट ऑफ होर्मुझ’बाबतच्या भूगोराजनीतिक घडामोडींमुळे जागतिक तेल बाजारात मोठी अनिश्चितता निर्माण झाली असून त्याचा थेट परिणाम भारतीय बाजाराच्या सेंटिमेंटवर झाला आहे.
