नुकत्याच अमेरिकेतील ‘IQAir’ या जागतिक पर्यावरण संस्थेने प्रसिद्ध केलेल्या अहवालानुसार, जगातील 122 सर्वाधिक प्रदूषित शहरांच्या यादीत मुंबईने अवघ्या एका आठवड्यात पाचव्या स्थानावरून थेट तिसऱ्या क्रमांकावर झेप घेतली आहे. मुंबईतील वाढत्या वायुप्रदूषणाची सरकारने दखल घेतली असून, रस्त्यांवरील धूळ कमी करण्यासाठी विशेष मोहीम राबवण्याचे निर्देश पर्यावरण मंत्री पंकजा मुंडे यांनी दिले आहेत.
वायुप्रदूषणाची नेमकी कारणे कोणती?
मिळालेल्या माहितीनुसार, बांधकामांच्या ठिकाणी साचलेले मलब्याचे ढिगारे, धूळ, उघड्यावर कचरा जाळणे, तसेच मेट्रो आणि बुलेट ट्रेनसारख्या पायाभूत सुविधा प्रकल्पांच्या बांधकामातून निर्माण होणारी धूळ हवेत मिसळत आहे.औद्योगिक प्रकल्प आणि उत्पादन कारखाने हेदेखील वायुप्रदूषणाचे प्रमुख स्रोत मानले जातात. कारखान्यांमधून सल्फर डायऑक्साइड आणि नायट्रोजन ऑक्साइडसारखे प्रदूषक हवेत सोडले जातात. याशिवाय, वाहनांची वाढती संख्या, वाहतूक कोंडी, डिझेल इंजिन, जुनी वाहने आणि वाहनांची योग्य देखभाल न केल्यामुळेही प्रदूषणात भर पडते.
मुंबई महापालिकेकडून कोणत्या उपाययोजना राबवण्यात येणार?
मुंबईतील वाढत्या वायुप्रदूषणावर नियंत्रण मिळवण्यासाठी मुंबई महापालिकेकडून विविध उपाययोजना राबवण्यात येत आहेत.
वाढत्या वायुप्रदूषणाच्या पार्श्वभूमीवर या उपाययोजनांची कडक अंमलबजावणी करण्यावर भर दिला जाणार आहे. मुंबईतील प्रदूषण कमी करण्यासाठी बांधकामांच्या ठिकाणी धूळ नियंत्रण, कचरा जाळण्यावर निर्बंध आणि प्रदूषणाच्या स्रोतांवर देखरेख ठेवणे महत्त्वाचे ठरणार आहे.
