मेट्रो प्रवाशांसाठी मोठा दिलासा! डब्यांची संख्या वाढणार; ‘या’ मार्गावर धावणार 6 डब्यांची मेट्रो
मुंबईकरांची दुसरी जीवनवाहिनी म्हणजे मेट्रो असं म्हणणं वावगं ठरणार नाही. कारण लोकलच्या गर्दीपेक्षा सुकर व अधिक जलद प्रवास हा मेट्रोद्वारे होतो. मात्र आता मेट्रोच्या प्रवासी संख्येत प्रचंड वाढ झाल्याने सकाळ व संध्याकाळच्या सुमारास मेट्रो स्थानकांवर प्रवाशांची गर्दी पाहायला मिळते.
यावर उपाय म्हणून आता घाटकोपर – वर्सोवा मेट्रो 1 वर 2 अधिक डबे वाढवण्याची दिलासादायक बातमी समोर आली आहे. त्यामुळे आता मेट्रो 6 डब्यांची होणार असून प्रवाशांचा कोंडमारा होणार नाही. यासाठी 22 डबे खरेदी करण्याची प्रक्रिया मुंबई मेट्रो वन प्रायव्हेट लिमिटेडने (MMOPL) सुरू केली आहे.
घाटकोपर-अंधेरी-वर्सोवा मेट्रोची क्षमता 50 टक्क्यांनी वाढणार
सुमारे 11.4 किलोमीटर लांबीच्या घाटकोपर-अंधेरी-वर्सोवा या मेट्रो मार्गावर दररोज 4.5 ते 5 लाख प्रवासी प्रवास करतात. सध्या या मार्गावर 4 डब्यांच्या मेट्रो ट्रेन धावतात, ज्याची प्रवासी क्षमता 1,178 इतकी आहे.
प्रवाशांची वाढती गर्दी लक्षात घेता या मार्गावरील मेट्रोला आणखी 2 डबे जोडण्याचा निर्णय घेण्यात आला आहे. 2 डबे वाढल्यानंतर मेट्रोची प्रवासी क्षमता 1,794 पर्यंत वाढणार आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.