नवरात्री म्हटलं की दांडिया आणि गरब्याचा उत्साह आलाच. नवरात्रीच्या दिवसांत शहरासह विविध भागांमध्ये गरब्याचे आयोजन केले जाते. पारंपरिक वेशभूषा, ढोल-ताशांचा गजर आणि गरब्याच्या तालावर थिरकणाऱ्या तरुणाईमुळे नवरात्रीच्या उत्सवाला विशेष रंगत येते. मात्र यंदा दांडिया आणि गरबा रसिकांच्या उत्साहावर वेळेच्या निर्बंधाचे सावट आले आहे. शासनाकडून दांडिया आणि गरबा खेळण्याच्या वेळेबाबत निर्बंध जाहीर करण्यात आल्याने आयोजकांसह रसिकांमध्ये नाराजी व्यक्त होत आहे.
यंदाच्या नवरात्रीमध्ये केवळ एका दिवसासाठी मध्यरात्री 12 वाजेपर्यंत दांडिया आणि गरबा खेळण्यास परवानगी देण्यात आली आहे. विशेष म्हणजे शनिवार आणि रविवार हे सुट्टीचे दिवस असूनही या दिवशी मध्यरात्रीपर्यंत कार्यक्रमांना परवानगी नसल्याचे सांगण्यात येत आहे. केवळ सोमवार, 19 तारखेला मध्यरात्री 12 वाजेपर्यंत दांडिया-गरबा खेळण्याची मुभा देण्यात आली आहे.
दरवर्षी नवरात्रीमध्ये शनिवार आणि रविवारच्या सुट्टीच्या दिवशी रात्री उशिरापर्यंत दांडिया-गरब्याचे आयोजन केले जाते. त्यामुळे नोकरी आणि व्यवसायानिमित्त दिवसभर व्यस्त असलेले चाकरमानी मोठ्या संख्येने या कार्यक्रमांमध्ये सहभागी होतात. सुट्टीच्या दिवशी मित्र, कुटुंबीय आणि सहकाऱ्यांसोबत गरबा खेळण्याचा आनंद घेता येत असल्याने शनिवार-रविवारच्या कार्यक्रमांना विशेष गर्दी पाहायला मिळते.
मात्र यंदा वेळेच्या निर्बंधामुळे दांडिया-गरबा रसिकांचा हिरमोड झाला आहे. विशेषतः नोकरी करणाऱ्या नागरिकांना कामाच्या वेळेनंतर कार्यक्रमस्थळी पोहोचणे आणि त्यानंतर कमी वेळेत गरब्याचा आनंद घेणे कठीण होणार असल्याची भावना व्यक्त केली जात आहे. आयोजकांनाही कार्यक्रमाचे नियोजन करताना वेळेच्या मर्यादेमुळे अनेक अडचणींचा सामना करावा लागू शकतो.
नवरात्री हा उत्साह आणि जल्लोषाचा सण असल्याने दांडिया-गरब्याच्या वेळेत करण्यात आलेल्या निर्बंधामुळे रसिकांमध्ये नाराजीचा सूर आहे. सुट्टीच्या दिवशीही रात्री उशिरापर्यंत गरबा खेळण्याची संधी मिळावी, अशी अपेक्षा अनेक दांडिया रसिकांकडून व्यक्त होत आहे. त्यामुळे यंदाच्या नवरात्रीत उत्साह कायम असला, तरी वेळेच्या निर्बंधामुळे त्यावर काही प्रमाणात विरजण पडण्याची शक्यता आहे.
